Küm 5 tsüngda yim 55,600 nung mobile service agütsütsü

New Delhi, July 29 (Agencies): India linük yim 55,669 tashi nung mobile coverage mali aser sorkari taruba küm pongu tsüngda item yim ajak nung coverage agütsütsüa akok.
Tang linük nung aliba yim lakh 5.97 nungi yim lakh 5.41 nung mobile service lir, aser tanüngba yim 55,669 (shilem 9.31) nung mobile service mali.
Tanü Rajya Sabha nung telangzüba ka agütsüdang Minister of State for Communications,  Manoj Sinha-i, “Küm pongu tsüngda mapang telemsa balala nung mobile service maliba yimtsüngtem nung service agütsütsü,” ta metetdaktsü.
Mobile service maliba yim timtibaji Odisha nungi yim 10,398 lir, iba sülen Jharkhand nung yim 5,949 aser Madhya Pradesh nung yim 5,926 lir.
Maneni Maharashtra nunga mobile service maliba yim 4,792, Chhattisgarh nung yim 4,041, Andhra Pradesh nung yim 3,812, Arunachal Pradesh nung yim 2,886, Assam nung yim 2,885 aser Bihar nung yim 2,534 lir.
Yimtsüng aser tezülen aliba tesemtem nung telecom service agütsütsü atema Telecom Department-i mera aika agiogo, item rongnung Northeast atema comprehensive telecom development plan aser Maoist-i timtem agütsüba state tem nung mobile towers amenoktsü atema sen crore 3,567.5 lemzüktsüba densema lir.
Iba dak alia Telecommunications Consultants India Limited (TCIL) danga Jammu & Kashmir, Himachal Pradesh aser Uttarakhand state tem nung aliba yim 4,752 nung mobile service aser Rajasthan, Gujarat, Punjab den Haryana state tem nung yim 2,138 nung mobile service agütsütsü atema project report renemang, ta tuyuogo.