Küm 57 tainbo memesük ?

Joko küm asem lir külenbo tain rogo (senior citizens) rongnung adentsü, saka tang tashi peisasa pei taküm aser kibong anepalu mesütetter. Tanurtem nem kaketshisatsü shitak aser tajung magütsütetter aser mapa inyaktsü inyakyima mesayutet taküm raksadaktsür. Asoajen tajung aser temanga shitak anema lir, saka anogo shia khenken senotsü apulen jajar aser khen khen meshimetsüa jajar ta peisasa inyaktetba aser ajangzüktetba nungi agütsübabo anogo kata mali, saka anogo shia tangar dang teka tendaker kua, kua ta senzür aser kibong nung iba nüngdak yabo periogo, iba mapa yabo junga inyakogo ta asüba anogo kata mali. Ano, tang ama tashidak wara arudang mozü alitsübajibo yutsür chiyongtsüa maka kidang kiyongertem dak dang metaloka alir. Iba kibongji, tangar masü, Nagaland state lir. Tangar kidanger state-tem 1972 küm akümba Manipur aser Meghalaya na dak asenok tang tashi metaloker alir. Iba sülen state 1987 küm akümba Mizoram aser Arunachal Pradesh state na ta matoksa. Nagaland nung Industries melapoktetba aser Engineering college kata taoba küm 57 tsüngda melapoktetba tamakokji yutsür, tanü ama tashidak wara agi amokmerendang nübortem jenoktsüsa taoba küm 57 nung Medical College kata melapoktetba state-ji Nagaland, aji asenok Naga nunger. Assam kija nung tang Medical college trok lir aser ano asem yakta renemtsü. Manipur nunga Medical college ka (Regional Institute of Medical Sciences) kabo lir. Itemji dang masü saka medical maparen nung asenoki Mizoram aser Arunachal Pradesh meneptsüa talangka lir. Taaktsüka, saka timtem nungbo makaba miimshitsü makoker, anungji tang coronavirus tashidak tendangtsü asoshia, maka nungji, azü tuzüka kar Manipur aser kar Assam leni yoker. Tang tashi nung Coronavirus agi Nagaland tonga lir saka matong ama bilema amongbaji asenoki coronavirus tashidak agi shiranger südi ta temulung melemi bilemba nisungji Gauhatii yoka adok. Aji oda, tang asenok asoshi shisabolutsü kaji, kü dak ka, tia mejungi, corinavirus wara agi tongra, nia Assam aser Manipur leniang yoktsü asü (?) ta asüba tasügdangbaji lir. Atangji, tanga state nung asüyonga teyarir alidak mozü ki tajung bushia yoktsübaji tim dang lir, saka tanü ama coronavirus tashidak yagibo khen nung nisung noklang ta dak atonger aser mozü kidang yipten aser teyarir agi meperir. US nung dena tang nisung paikaya asüba ya mozü makaba kija agi masü saka teyarir agi meperir, kechiyong khen nung tashidakji nisung meyirjang dak atonger. Ano, tebilemtsü kaji iba tashidak agi asürtem temang ya tanga state nungi bener marutettsüa akok. Item ajakji kodang bilemdangdir, shiba dakang matong, asensasa asen aitsütsüba dang lir. Taoba küm 57 tsüngda yimsüsüa arurtema kechisa bilema yimsü asü (?) ta asüngdangnütsüka. Tang yimsü tesüdakpurtem rongnunga aika küm metsü semer ruling government nung dena aruba yimsüsürtem lir. Parnokia tanü ama kodamasüba tensa ajurudang kechi bilemer ? Naga nungerbo election-i aiba ya Nagaland atema masü pei atema rongsen lenmang bushitsü atema air asü ta aiben bilemtsüsa inyakba angur. Ajisüaka, ano Nagaland nung election ya sen agi sen melenba business amai dang küma angudangbo, tang tashi, taoba küm 57 tsüngda, medical college kata melapoktetbaji aser tanü ama tashidak anema tongpang ayongzüka yur raradang tejenokdak kiojen maka, raradi asüa majung aser jendi asüa mejenbur ta asüba tia ka Naga nungertemi ajuruba ajak ya election nung senyong vote ayokba ajanga lir ta ashitsüsa adoker. Election yamato tashiyim, sen aser machimajemtsü dena amshia agi tashibo, Nagaland nung mozü ki kata shitak meyanglutettsü aser school nung tanurtem amentsü medena magütsütettsü. Ano, asenoki aiben Nagaland merenloktetba ya telong nung alirtem nem tongloktsür saka telong nung alir timtem yabo Manipur nungsa taliba aser tanga state-tem nunga lir. Item ajakji kodang asenoki asadangdir, tapu aika jembiyonga, yimsüsürtemi kechi lemtetter aser koma inyaker ta asüba dak tuluka keta lir. Aji oda, yimsüsürtemi anir tang nungi danga nübortem ajaki Nagaland tama aser asen tesü ta bilema inyakra, Nagaland ya ajungtsübasa aser Nagaland jungra asenoka tajung asütsü.