Küm 58 tejakdang pa meinba sepai ka den Dalai Lama-i ajurutep

Guwahati, April 2 (Agencies) : Tibet nunger tamangba lennir Dalai Lama-i küm 58 tejakdang Tibet nungi jena arudang pa meinba Assam Rifles sepai ka den Deobarnü ajurutep.
March 1959 nung Dalai Lama-i Tibet toktsür jena arudang AR sepai 5-i pa nüka mein aser parnok rongnung nisung ka dang taküm lir.
Paji AR retired jawan Naren Chandra Das lir aser tanü Dalai Lama-i pa den ajurutep.
Assam sorkari Guwahati nung ayongzüka amungba ‘Namami Brahmaputra’ River benjung nung iba sentong ya agi.
“Kangasa pelar. Küm 58 tejakdang ni India-i arudang nüka meinba Assam Rifles züngsem tejen ka ajurudang ni kanga pelar” ta Dalai Lama-i temulung shiranga ashi.
“Nü tejak angudang, nia kanga tambur kümer asütsü ta bilemteter” ta paisa Das dang asayamenüa ashi.
Tanü sentong nung arishi küm 76 tain Das-i Assam Rifles uniform sübor shilem agi. Sentong tembanger osangbener den jembidang pai ashiba agi, “ni 1957 küm Assam Rifles nung adenba sülen küm ana lir, 1959 küm Dalai Lama indang armed guard ka ama mapa inyak.”
Arunachal Pradesh kübok Lungla nung training agiba sülen pa China arrtsü anasa Lungla nung mapa lemzüka liasü, ta Das-isa shisem.
“Assam Rifles Platoon no. 9 nung sepaitemi Zuthangbo nungi Dalai Lama anir aru aser Shakti nung ozü pungu nem pa anüktsü mapa lemzüktsü. Onoki pa Lungla tashi mein aser idak nungjagi tanga sepai telok kati Tawang tashi mein” ta paisa metetdaktsü.
Dalai Lama meinba mapang pa den sensaksem asü masü ta osangbenertemi asüngdangdang, “onok pa den o jembitsü mesüra sensaksemtsü atema temelaba magütsü. Onok pa meintsü atema dang mapa lemzüktsü” ta Das-i langzü.
Dalai Lama-i pa den ajurutepa azüitdang pa tenarong nung kechi o ashi ta asüngdangdang “Pai ni ajuruba atema pelar ta ashi” ta paisa langzü.
Tanü sentong nung Dalai Lama-i Naren Chandra Das nem ‘silk shawl’ ka sempet agütsü.
Iba sentong nung Assam Rifles Director General Lt Gen Shokin Chouhan den tongti ketdangsertem aika aden.