Küm 7 tsüngda CPRF 228 soseta süogo: Sorkar

New Delhi, July 22 (Agencies): Tesüiba küm tenet nung CRPF sepai ajak agi 228 soseta süogo, ta tanü sorkar osang ka ajanga metetdaktsü.

“Au, data anguba ajanga, CRPF sepai 228 soseta süogo. Item kuli timbaka nija tebilemtsü aser kibong tebilemtsü den apuani pilar aliba ajanga mangatettep, tsükchitepba, shisatsü minprongba aser tejashi densema lir,” ta sorkari ashi.

“Ano kuli rongnung kasaji (soseta asübaji), mapa dak sentakba nung anibelem ajanga lir,” ta minister of state for Home Kiren Rijiju-i Rajya Sabha senden nung metetdaktsü.

Linük nung central armed police force tulutiba, Central Reserve Police Force (CRPF) nungi sepaitem soseta asübaji 2008 küm nungi 2014 tashi nung atalokba lir.

CRPF ketdangser lakh asem jungnüa lir aser CRPF, BSF, CISF, ITBP, SSB aser NSG sepaitem dang anogoshia physical exercise agiba nung yoga densemtsü asoshi ministry-i metetdaktsüogo, ta Rijiju-isa ashi.

“Paramilitary sepaitem anogoshia exercise nung Yoga ya shilem ka asütsü junger. Iba ya ajanga paramilitary sepaitemi anibelem nungi jenbutsü aser parnok temang o shisatsü naprongla nung junga alitsü,” ta minister-isa ashi.