Küm 70 nung tan Hombar aonung ita tulutiba angutsü

New York, November 12 (Agencies) : Kodang ita rangben ngudir asenoki aseni meimertem bilemteter aser küm 70 shi nung tan mezüngsüa, Hombar aonung ita tulutiba (supermoon) angutsü.
Hombar aonung angutsü aliba itaji 1948 küm nungi tang tashi nung ita alima tsütsüi kanga anasa aruba ita rangben asütsü aser alima nung alirtemi 2034 tashi iba ama ita tulu joko mangutsü.
NASA osang ajanga ashiba agi, alima longa ita jajaba lenmangji entsü amai tejoklang lir anungji ita ya khenkhenbo alima tsütsüi kanga anasa arur saka tanga mapangtem nungbo alima nungi talanglang pila aoer. Ita rangben adokba mapang kodang alimai kanga anasatepa arudir iba ita dangji English oshi nung ‘supermoon’ ta ajar.
Ita aser alima na kanga anasatepa aruba tesem dang ‘perigree’ ta ajar aser iba mapang alima o ita na talangtiba pilaba tesem ‘apogee’ nungi anguba dang nungi noklang nung shilem 14 sü agi tuluba angur.
Hombarnü India nung anüluli ita ji perigee nung alitsü.
Iba aonung ita rangbenji tanga mapang dang nungi tuluba angutsü aser alima nung tanga mapang dang nungi noklang nung shilem 30 agi tesawang tali yaloktsütsü.
“Iba anonung sülen tanabuba aonung ita melenshiba janga mereprangtettsü. Anüluli reprangdangra nai temelenshiji angutsü. Iba aonungji ita rangben adoktsü anungji itaji anüluli adoktsü. Iba ita tuluji reprangtsü atema aonung sangwa nükentsü kecha tenüngdaktsü mali,” ta NASA indang Lunar Reconnaissance Orbiter (LRO) mission nung deputy project scientist, Noah Petro-i ashi.
Küm nung supermoom asemben angur aser tan ya tanabenbuba lir anungji tan mepet agi sübanger nai itaji manguka asüyonga shisa tebulu kechiba süra 2016 atema tasembuba supermoon ji December 14 aonung reprangtettsü.

You must be logged in to post a comment Login