Küm 80 tain Tsukiji ango ayokdak mi adok

Tokyo, August 03 (Agencies): Japan nunger asoshi kanga nüngtugu aser alima nung ango ayokdak tesem tulutiba, Tsukiji fish marker nung mi adoka arong.
Tokyo nung iba shishilembaba tesem ya küm 80 tain lir aser iba tesem nung tuna angu anogoshia auction asür aser Japan yimtiba nung aliba sushi restaurant tem nem iba tesem nungi ango agütsür.
Iba shishilembaba tesem nung Brehostibarnü mokozü tulu adoka mi remsepba gari aser nisung aika adenshia mi ya remseptet aser iba lendong nung nisungtem tashi agi yiruba osang bo meliasü.
Iba tesem nung mi ya 07:50 ako (GMT) meta adok aser iba tesem aser temeket ajunga shibangogo, ta osang ajanga ashi.
Iba tesem nung sushi restaurant aser dokan aika lapoka lir, aser item tesem kar bo shibangogo, ta osang ajanga ashi.
Aji süaka Tsukiji telung nung anogo shia tuna auction asüba tesem nung mi agi mokongshi, ta osang ajanga ashi.
Iba mi adokba kuli ya anu mejangjateter aser iba mi lendong nung ki aika mitsü küma rongdok.
Iba shishilembaba tesem ya 1923 küm Kanto menoknok tesashi anokba sülen 1935 küm yanglu.
Iba tesem nung ango tabu aika ayoker aser iba ajanga raliwalirtem asoshi tongtipang tesem ka lir.
Iba shishilembaba tesem ya 2017 küm tatemlen tesem tangai belentsü liasü.