Küm 9 tetsür chanu kati company indang juice pongdang melendaktsü

New Delhi, February 18 (Agencies): Guwahati nung arishi küm teku tetsür chanu kati ‘juice’ ajemtsü asoshi memolung; Juice pongdang nung tebur chanu ka uniform semer noksa inokja aliba ngua, iba juice ji teburtem atema dang ta shia lai iba juice majem.
“Real fruit juice ya tebur temi dang jemtettsü asü?” ta tetsür chanulai juice pongdang nung tebur chanu ka uniform semer aliba ngua tebu Mriganka K Majumdar dang asüngdang. Juice pongdang nung yamai zülua liasü, “Ner chir asoshi koba tajung lir iba ajanga paa menüdaktsütsüla.”
Iba ken o atema tetsür chanula tebui Women & Child Development Union Minister, Maneka Gandhi dangi shidi ka züluba sülen ibaji Ministry-i agizükogo. Juice asepba pongdang nung noksa aser zülua aliba ojangtem ajanga lokti nung shilem kar mezüngshir ta, shidi nung zülur liasü.
“Ni kanga süngmang aser la dang langzütsü kecha meliasü,” ta Majumdar-i ashi. ‘Real’ juice yanglurtemi jalatem nem akhümtsübu agütsütsüla, ta pai shisem.
Company-i iba ya tetsürtem mezüngmeshirba masü, ta shiogo.
“Pongdang nung ‘pa’ ta zülur alibaji tanurtem ajak tenüng nung inokba lir. Tetsür aser tebur ta lemdangba olen ka masü ta jangjashitsüner,” ta Dabur-i sangdong.
Company-i tarutsü nung yamala mangatettep madoktsü asoshi pongdang melentsü molunga lemtetogo.
Parnokisa ashiba agi, “Majumdar-i benokba onük nung onoki jangjashitsünübaji, Real Fruit Power nungbo tetsür chanu ka dena lar kibong züngsem pezü noksa inoka lir.”
Company-i ashiba aija Majumdar-i yamai ashi, “Dabur-i tetsür chanu noksa nung densema lir ta ashibaji tiyazü. Real juice 200 ml pongdang nung tebur chanu ka uniform semer lir, aser iba dang tuluba liter 1 pongdang nung tetsür noksa ka lir.” Aji saka parnoki pongdang melenshitsü atema lemtetba asoshi pelar, ta pai shisem.