Küm ana nung Bangladesh arrtsü shibangtsü: Sonowal

Guwahati, May 21 (Agencies): Assam Chief Minister atema tenangzükba agitsü alisang, Sarbananda Sonowal-i, Bangladesh den arrtsü shibangba maparenji küm ana nung atemtsü, koba ajanga ozüng alema bendanger aitba anentsü, ta tanü metetdaktsü.
1980s mapang nung kaketshir lenir ka ama Sonowal-i bendangertem ozüng alema state telungi aitba anema longkak aitba nung shilem agia liasü, aser tan election nung pa lenisüba kübok BJP-i takok nguogo.
Election nüboyimba mapang Sonowal-i, BJP sorkar tashii arura sorkar atema tongtibangtiba onükji bendangertem ozüng alema aitba onük asütsü, ta nangzüka liasü.
Osangbener den sensaksemdang Sonowal-i, “Arrtsü teti atema shibangtsü atema Union Home Minister, Rajnath Singh-i küm ana lateta yutsüogo. Iba mapang nungjisa ayong arrtsü densema arrtsü shibangba mapa tembangtsü atema onoki inyaktsü,” ta ashi.
Taküm January ita nung Home minister Rajnath-i Karimganj district nung India-Bangladesh arrtsü semdangba mapang pai, Assam arrtsü ‘barbwire’ agi atsüba maparen takümsa tembanga inyaktsü, ta shia liasü.
“Teti atema arrtsü shibangba sülenbo ozüng alema bendangertem aitba khenyongi anentsü,” ta Rajnath Singh-i jembia liasü.
Bangladesh nungi ozüng alema state telungi aitba anema kechi inyaktsü, kechiyong IMDT Act agienba ya nai anemer, ta asüngdangba langzüdang Sonowal-i, “Assam nung tang teinyakdak National Register of Citizens (NRC) draft kodang tembanga inyakdir, shirnok sensotem lir aser shirnok bendangertem lir’ar jangjatsü. Iba tebilemtsü malitsü aser ozüng alema aitertem nem ozüng nung aliba ama temerenshi agütsütsü,” ta ashi.