Küm ana sülen telemtetba agitsü : Tarun Gogoi

Guwahati, April 18 (Agencies) : Tan election ya pa asoshi tatembang shilem agiba election asütsü ta ashisang, Assam Chief Minister Tarun Gogoi-i, pa tan election nung takok angu nungbo office nungi anentsü mesüra manentsü telemtetba küm ana lir agitsü, ta shiogo.
“Party nung kü shilem atema küm ana sülenang telemtetba ka agitsü. Taruba küm pongu atema State Chief Minister inyaktsü meinyaktsüji kü sasa lemtettsü,” ta ashidang tang election ya dena pa küm pezübuba atonga atonga election nung takok angutsü ta ashi.
Arishi küm 80 tain, Gogoi-i, tan Assembly election ya pa atema tatembang shilem agiba election asütsü, ta metetdaktsüogo.
“Taruba election nung ni shilem magitsü. Joko congress-i ni meli-i raratsü,” ta pai ashi.
Aji oda süaka pa mapa shiba nem melenoktsütsüar pai ano memetetdaktsü.
“Lenir aikati ni anemer. Lenirji kaji lokti nungi adoker,” ta pai ashi.
Pa melen shiba shimtsü ta asüngdangdang pai, “Anjan Dutta, Paban Singh Ghatowar, Bhubaneswar Kalita, Ripun Bora, Pradyut Bordoloi aser Rakibul Hussain nunger amala lenir tajung aika lir. Item rongnung kati ni melentsü,” ta langzü.
Gogoi-i tesüiba West Bengal Chief Minister Jyoti Basu-i pa yimsü tesüdak nung pai temulung lemtetsang Buddhadeb Bhattacharjee nem chief minister menden agütsüba otsü ashi, ajisüaka pai iba dak sentakba nung pa bilemba aika merasa.