Küm ana tsüngta Russia-i missile tasen yanglutsüla: Sergei Shoigu

Moscow, Tsüklai/Feb. 05 (Agencies): Washington aser Moscow na tsüngta raraba oset azüoktsü asoshi tongtibang tezüngzüktep raksaba sülen, Russia-i taruba küm ana tsüngta missile system tasen yanglutsüla, ta Russia defence minister Sergei Shoigu-i Mongulbarnü ashi. Intermediate-Range Nuclear Forces (INF) tenangzüktep nung Russia-i aibelener, ta United States-i aiben aitsü aser iba treaty nung ita trok tsüngta nung bilatsü asoshi Washington mapa tenzüker, ta Tir Donald Trump-i Hokulbarnü shia liasü.
Kasa mapang Moscow-ia iba tezüngzüktep yutsür aser Cold War mapang renemba tezüngzüktep raksatsüsa raraba hadir tasen yanglutsü tenzüker, ta Russia Tir Vladimir Putin-ia Honibarnü metetdaktsü. 1987 treaty yutsüba ajanga raraba nok-o-nü tasen yanglutsü tenzükba sayur, ta aikati shisateta lir.
Mongulbarnü ketdangsertem den senden ka amenba mapang, Russia-i taruba küm ana tsüngta missile system tasen ana yanglutsüla, ta Shoigu-i ashi.
“2019-2020 mapang asenoki meta talang nung khaloktsütsü akokba missile keta aliba seaborne Kalibr system ya ali nungi amshitettsüsa yanglutsüla, koba Syria nung junga amshitetogo,” ta Shoigu-i defence ketdangsertem dang ashi.
“Kasa mapang asenoki long-range hypersonic missile dener land-base missile system yanglutsüla, aser iba sentong ya Putin-i agizükogo,” ta paisa ashi.
INF tezüngzüktep ajanga ground-launched, shirt aser intermediate-range missile tem nokdanger saka anüng nungi tzüyim nung khaloktsüba missile tembo menokdanger.
Tzüyim aser anüng nungi khaloktsüba missile system ali nungi amshitsüsa yangluba ya Russia atema tajangzük asütsü, kechiaser iba amala missile yanglutsü ya jenjang talangba aser tekeraba asütsü, ta Shoigu-i ashi.
Paisa defence ketdangsertem dang ali nungi khaloktsüba missile meta talangtem yanglutsü shisemogo.
Saka United States-i mezüng mera magi tashi Russia-i iba amala missile ya Europe mesüra tanga linüktem nung khaloktsütsü renema mayutsü, ta Putin-i Honibarnü Shoigu dang shia lir. INF treaty ya 1987 küm US tir Ronald Reagan aser Soviet lennir Mikhail Gorbachev na tsüngta zülutepa liasü.