Küm asem jungaka tajung anogotem marur: Shiv Sena

Mumbai, September 04 (Agencies): Union council of minister tem melenshitsüji nüngdak, ajisüaka Narendra Modi’er sorkar aruba sülen maneni sorkar tendanga inyaker, aser nüburtemi tang tashi ‘tajung anogotem’ tu atadar, ta tanü NDA sorkar nung teloktep party, Shiv Sena-i aitsü.
Modi-i anir Centre nung sorkar akumba sülen Union cabinet asemben tashi melenshiogo/melentepogo, aser iba dak sendakba nung Shiv Sena-i tanü sorkar aija jembir.
Shiv Sena indang osangkaket ‘Saamana’ yimobilem nung, “Portfolios melenshibaji BJP indang telung inyakyim ka lir. Asenoki ola madoki malitsüla, kechiyong iba ya ajanga linük security aser linük terenlok nung tetsükdaktsü bener arutsür,” ta aitsü.
2014 Lok Sabha election mapang nung BJP-i nübur dang tajung anogotem arutsütsü, ta nangzüka liasü, aser ibaji aija Shiv Sena-i, “Modi’er sorkar küm asem jungogo, saka tang tashi ministry melenshir (minister tem portfolio melentepba). Nüburtemi tang tashi `tajung anogotem’ tu atadar,” ta ashi.
“Modi aser BJP tongti Amit Shah nati shimba nübotem aniokogo,” ta Sena-isa ashi.
Arishi kanga tain asübayong lenir kar ministry nungi agienogo, ajisüaka tanoburtemia junga meinyaker, ta Uddhav Thackeray-i aniba Shiv Sena-isa aitsü.
Shiv Sena ya Maharashtra aser Centre naprong nung BJP den loktepa lir.
“Demonetisation kanga mejungi tamakok nguogo. Osettsüset aser chiyungtsü nung jenjang kanga atur aser mapa manguba tebilemtsü tali bulur. Nüngdakba chiyungtsü, aben-süoshi aser talidak ki tebilemtsü maneni lir,” ta ‘Saamana’ osangkaket nungjisa shia alir.
“Bihar, Assam, Odisha aser Uttar Pradesh ama state tem tzümetsüng agi raksatsüogo aser sorkar mozükitem nung nisung asüba manener. Koba ministry-i item tebilemtsü koktettsü?” ta Shiv Sena-isa asüngdang.