Küm asem tsüngda Arangtet Tatidang tenren balala nung nisung 127-i takok nguogo

5 buba ASLB Arangtet Tatidang takoker nem kulikaket agütsüba sentong ka yangi Mokokchung town hall nung agir külen takokertem den tongti shilem agirtem aser ASLB züngsem külemi tangokba noksa nung angur. Mokokchung, Oct 2, 2019 (Photo courtesy: Imnawabang Jamir)

Mokokchung, Oct 2 (TYO): Oct 2 nü Ao Senden Literature Board (ASLB)-i ayongzüka 5 buba ASLB Arangtet Tatidang takoker nem kuli agütsüba sentong tulu ka yangi Mokokchung town hall nung meraketa agiogo.
2017 nungi 2019 tashi nung nisung 127-i arangtet tatidang tenren balala nung takok nguogo. Küm asem tsüngda Arangtet Certificate Tenren (ACT) nung nisung 20, Artangtet Diploma Tenren (ADT) nung nisung 103 aser Post Graduate Diploma Tenren (PGDT) nung nisung 4-i takok nguteta liasü. 2006 nungi ASLB-i Ao oshi renlokdaktsütsü aser zülumen lirumedemtsü nükjidong yur arangtet tatidang ya agia arur.
Sentong nung tongti o jembir Eastern Theological College, Jorhat, Principal, Wt. Rev. Dr. Narola Imcheni jembidang, tanü putu nung nisung aikadi Ao oshi ya samatoktsü ta jembia angashir, iba ama tensa ka nung ASLB-i asen oshi bushitsü lenmang piteta aser kanga meranga inyakba angudang pelar, ta ashi. Laisa lanurtem dang Ao oshi renlokyonga aotsü asoshi khuret abentsüla, ta shisem.
Laisa Ao oshi aser tetsü oshi wazüka ayutsü indang onük kar lemsatepdang, Ao oshiji pei atep/kidang nungi jembia tenzüktsüla aser ibaji tsüraburi pei chirnurtem dang sayutsüla, ano oshi renlokba nung Sunday school yaa kanga tongtibang sabang ka lir, anungji, Sunday school tesayurtemi iba nung ya shilem tulu agitettsü, ta ashi. Iba den lanurtem oshioben tsütsü shisa tarok bushitsü aser riju balala nung Ao oshi azüngtsü ajungshiteptsüla, ta tebilemba kar lemsatep.
‘Oshi ka ajanga asen maitsü/ayak jangjar, nisung ka ayak mejangjara pa/laji iba lima nung mezüngoktsü. Asenoki pei tetsü oshi mezüngtetra aser mejembitetra, asenokji ayak tejangja aliba nüburtem ta meshitet aser shingaia asenokji akhüm metsübutsü, anungji, lanu putu nem tetsü oshi tongtibang indang ya kanga junga angatetdaktsütsüla aser parnoki jangratsüsa lenla balala nungi merangtsüla’, ta laisa ayongzük.
Tanü ASLB-i ketdangsüa agiba Arangtet Tatidang nung shirnoki temulung agüja takok ngua kulikaket agizüker, ajak nem tenüngsang agütsür. Saka ibai tatem mesüdaktsüi karibo oshioben tsütsü doctorate tashi ngutettsüsa merangteptsüla, ta laisa takok angurtem ajungshia liasü.
‘Akhi asen tetsütebou Jungliyimti nungi arudng bener aruba Aor ajak külem meyong senmangbo kecha makatsü südi, saka Ao oshi yabo parnoki jembia aruba tanü tashi asenokia jembir asünung, ya otsüla oboula nungeri toktsüba Aor arok senmangji lir, anungji, iba senmang ya ajaki apayua amshitsü merangdi’, ta laisa ayongzük. ‘Kodang asenoki Ao oshi jembitsü, zülutsü aser angazüktsü merangdir, idangji asen oshi samatsü tia aliba nungi kümzüktsü’, ta laisa shisem.
Ao Senden tir Wb. Chubawati Longchar aser ASLB mendenbuba Dr. L. Temjen Jamir tena ajanga AT nung takok angur nem kulikaket agüja liasü. Sentong nung ASLB Chief Patron Wb. Jemti Mollier, ASLB Secretary Wb. I. Temjen Tzüdir, AGP & Director, Nagaland Lokayukta Police aser ASLB Züngsem Wb. I. Meyionen Jamir parnokia shilem balala agia liasü.
AT takoker nungi Wt. Yongthangnaro (ADT) aser Wb. Aotemjen (PGDT) nadi mapang tatsütsü agia jembi. ASLB Züngsem Dr. Lanurenla iba sentong nung menden liasü aser Town Hr. Sec. School Mokokchung kaketshirtemi telok saksalemdakja ken tajung ka aten. Iba sentong pastor Rev. Lima Lemtur den temoatsü meshia sarasademer tenzük aser pastor Rev. Dr. Noklen Lkr den tenüngsang agüja sarasademer tembang.