Küm shia NE nung TB agi shiranger shilem 5 asür

Agartala/Aizawl, March 24 (Agencies): Northeast India nung kümshia tuberculosis (TB) tashitak agi shiranger shilem 5 asür, ta tanü Brihostibarnü mongin kati metetdaktsü.
World TB Day anogomung nung osangbenertem den jembidang TB tashitak mongin, Babul Das-i, “Northeast India nung kümshia TB tashitak agi shiranger shilem pongu shi asür. National average-a kasa lir,” ta ashi.
Das ya TB indang National aser international scientific medical sentong aika nung dena aruogo aser World TB report 2015 osang nung ajemdaker pai, alima nung TB tashitak khuret agi anenba nung India linük maneni shilem 23 lir, ta ashi.
Paisa, küm shia India nung nisung million 2.2 shi TB tashitak adoker aser nisung 220,000 shi iba tashitak ajanga asür, aser iba ya ajanga iba tashitak anema mera aika agitsü nüngdaka aliba kuli sayur,” ta ashi.
Paisa ashiba agi, case aika nung iba tashitak indang aser teyari indang meteta maliba jangjaogo, aser ibaji ajanga TB tashitak agi cancer aser HIV-positive akümer aser aika temulungjang tashitak ajanga asür.
Tanü Northeast tesem ajaklen World TB Day anogo munga seminar, workshop aser awareness sentong balala kaogo.
Das ya Tripura health department nunga densema lir aser pai, yaküm Tripura nung nisung 2,528 dak TB tashitak puteta teyari agütsü, ta ashi.
“2015 küm Tripura nung tajemba agi nisung 11 asü. Takok anguba shilemji 89 liasü,” ta paisa metetdaksü.
Ano Aizawl nunga Mizoram Health Minister, Lal Thanzara-i, yaküm state nung TB tashitak ajanga tajemba agi nisung 38 süogo, ta metetdaktsü.
Tanü TB sentong ka nung jembidang Health minister-i, “2015 küm nisung 2,090 dak iba tashitak putet. Yaküm nungi tenzüka state nung TB agi shiranger shilem 84 dak tema taneptsü nguogo,” ta ashi.
Taküm World Health Organization (WHO)-i ‘TB tashitak samatsütsü asoshi longjemtsüla’ omen shimteta alima ajaklen ‘World Tuberculosis Day’ ayongzüka mungogo.