Küm tatemlen India NSG züngsem akümtsü atema lenmang ka lir: US

Washington, June 25 (Agencies): Hokolbarnü Korea yimtiba, Seoul nung Nuclear Suppliers Group (NSG) Plenary senden tembangba sülen ghonda ishika lir US-i, taküm küm tatemlen tashi nungbo India NSG züngsem akümtsü atema lenmang ka lir, ta ashi.
India-i NSG züngsem akümtsü atema benoka liasü, ajisüaka China-i anir tanga linüktemi India anema nokdakba ajanga India züngsem akümtsü atema telemtetba magiteti anogo ananü senden tembanga liasü.
US Tir, Obama’er tongti ketdangser kati, “Taküm küm tatemlen tashi nungbo onoki lenmang ka angutsü ta onok teimla lir,” ta ashi.
“Iba atema mapa kar inyaktsü nüngdaker. Ajisüaka taküm küm tatemlen tashi nungbo India (NSG) züngsem akümtsü ta onok teimla lir,” ta ketdangserisa metetdaktsü.
Züngsem 48 aliba senden nung o lemtepba aser India züngsem akümtsü anema nokdakba osang lemsateptsü memulungi ketdangserisa, telung nung o lemtepbaji tema nung melemsateper, ta ashi.
Ajisüaka US-i India NSG züngsem akümtsü atema iba onük nung Obama’er ketdangsertemi New Delhi aser  tanga linüktem den meranga inyakogo, ta paisa ashi.
India NSG züngsem akümtsü benokba nung China-i anir tanga linüktemi odiodia India anema nokdakba ajanga India-i tamakok angu.
India ketdangsertemi ashiba agi, iba onük nung linük 38-i India pusema liasü.