Küm ter tsüngda government ali aliba nung sen crore 320 endok

Dimapur, July 12 (TYO) : Sensosanger kari RTI ozüng ajanga Deputy Commissioner-tem aser government department balala nung ketdangsertem dang nungi  metetnüa asüngdangbatem parnoki langzüba ajanga metetba agi, 2006-07 küm nungi 2015 küm tashi nung Nagaland government kübok department balalai pei department nüngdak asoshi ali ajak agi 273 alia liasü ta metetogo ta sensosangertem jagi sangdong ka nung metetdaktsü.
Item ali 273 rongnung jagi ali 162 aliba nung sen Rs.320,43,34,909 endok aser tanüngba ali 111 atemajibo sen agütsür asü magütsüar kecha kuli agüja mali. Item rongnung Peren DC dena lir aser parnok dakji ano tapet mapa inyaktsü asoshi ken o benoka lir ta parnokisa ashi.
Ano, takoksa kaji, ali atema senbo agütsü saka department-i taiga magir aser anepalua masür ta yua alibaji NIIT atema aliba Hovukhu yimtak ali ka lir aser ano Padampukhuri nung  Go-Carting lapoka alidak lijia yamaji senbo agütsü saka magii dang lir. Item liji department-i mesüra taginüri meyipa agitsüsa asüngdangteptsü ajungshiteptsüla ta parnokisa metetdaktsü.
Iba amaji government nung bangdak amertemi pei ajung asaa nübortem akoksatsüsa government rongsen lalur, ,anungji yamaji meinyakdaktsütsü asoshi nübortem longjemer inyaktsüla ta parnokisa metetdaktsü.