Küm züngya melenshitsü !

India nung Narendra Modii aniba NDA government kümer küm asembuba ayaok tashi nung aritepa linük nung temelenshi aika bener arutsü merangba angur. Item rongnung mezüng Narendra Modii aniba government-i bener aruba temelenshiji linük atema sentong yanglua senotsü lemzüktsüba telok Planning Commission melena NITI-Aayog shimba mapa liasü. Iba sülen kasa linük aser kasa government süaka küm aika Railway budget o Union budget na balala yanglua inyaka aruba inyakyim melenshia Railway budget-a Union budget den külemi loktepdaktsüogo. Iba sülen ano linük nung tax magütsüi ayuba ochimashi sen putettsü atema sen 500 aser 1000 note (denomination) melena sen 2000 note adokogo. Ano, tang Narendra Modii melenshinübaji government küm ( Financial year) alemli British nunger mapang nungi amshia aruba April 1 nungi March 31 tashi küm ka ta asükba melena January ka nungi December 31 tashi government küm sünür. Pai iba tebilemba ya tawa state ajak nungi chief minister-tem den senden ka amendang metetdakja liasü. Ibaji dang masü saka ano Narendra Modii melenshinüba mapa kaji linük nung parliamentary aser assembly election ya state ajak nung külemi dang linür. Tangbo Parliamentary election state ajak nung mapang ka nung agiba dak alaka küm shia state balala nung asembly election agir, anungji linük nung ‘electoral politics’ jembi manener. Iba jagi linük nung terenlok mapa inyaktsü asoshi jembitsü mapang peria mangur. Iba ama shisatsü aser tebilemba tasen bener aruba jagi linük nung temelenshi tajung bener arutsü imlar. Aji oda, tang Narendra Modii melenshinüba rongnung goverment küm March nung tenzüker April nung atemba yimya ya lir. Atangji, April nungi küm tenzükba yimya ya 1867 küm British nungertemi India lima parnok kübok alidang tenzükba maparen ka lir, kechiyong England nunger küm tasen tenzükba anogoji March 25 liasü saka kodang Julian Calendar nungi Gregorian calendar-i melen, küm tenzükba anogoji March 25 nungi April ka agi melen. Otsü agi ashiba agi, 45 BC nung Rome nunger chuba Julius Caesar-i anü arakzüba takzüa küm ka nung ita ter ana alitsü aser March 1 nungi January 1 tashi azüng. Ano, iba sülenjia linük aika nung Christmas anogoang küm tasen tenzükba anogo ama among aser alima aso 9 buba nunga Europe lima kar nungbo March 25 anogoang küm tasen anogo ama agizüka among. Iba anogoji Christmas anogo atongtsü ita tuku lia tenyar Gabriel-i tasüngtet Mary dang laji alima kümtetdakba Messiah tetsü asütsü ta jungkai adoka metetdaktsüba anogo liasü ta amanga züngshi. Ajisüaka, March nungi tenzükba calendar ajanga azüngba anogotemji kümtem süitema aodang meshitaki züngtetba ajanga 1582 küm Roman Catholic putir Pope Gregory XIII-i tang asenoki amshiba January ka nungi tenzükba calendar ya amshitsü temelaba agütsü. Ajisüaka, England nunga 1752 küm nungiang iba calendar amshia aru. Iba 1752 küm ya tamalen Julian calendar amshia arudang anogo sükpetba shitak küma yanglushitsü atema September 3 nungi 13 tashi mali küma züngdoka liasü. Tetezü, 1752 küm calendar nung september 3 nungi 13 tashiji anogo 11 mali asü. Iba amaji mapang mapang shia küm asükba yimya ya melenshia aru. Atangji, kin shia küm tenzükba otsü aser mapang lir. Aji oda, Naga nunger kin karibo April ita ya-ang  küm tenzükba ita ama züngshir. Iba amaji küm tenzükba ya ita anü arakzüba apia latetter. Ano talisa küm tenzükba aser atemba ya nisungtem mapa inyakba den putepa alitsüla. Aji oda, nisungtem ya aluyimer teimba aser aluyimba mapa ya tongtibangba asünungji aluyimba mapa tenzükdang küm tenzükba aser alu mapa atemdang küm atembajisa tajungba asütsü. Ano, goverment küm kodang tenzükdir, küm piyong asoshi senotsü sentong yanglutsü. Anungji, India ama aluyimer teimba aliba lima ka asoshi January nung senotsü sentong yangluba agiang nübortem asoshi teyari angutsüba mapang shitak nung angutsü. Ano, yimkong asoshi calendar tapu ka aser government calendar-bo balaka ta asüba nung aiben nübortem nüngdak mataloker. Iba ama temelenshi bener arutsüba mapatem nung yabo Modiba ya kanga junger !