Kümdanga Proktsüla – T.Ken 109:14-20

Nai kechi meimer iba jagi na koda alitsü lemtetdaktsür. Kechi agi asenok peladaktsür iba jagi asenok anir. Dawidi pa tsükchir indang zülu, “Pai atakatem meimba ama aji pa dangi arudakjang, pai temoatsü nung pelaba nung aji pa nungi talangka piladakjang.”

Nai kechi meimer ? Nai kechi jangrar ? Nai kechi prok kasaji nai arutsü.Tsükchirtemi atakatem proka liasü aser parnoki dangi tejashi arutsü ta Dawidi metetta liasü. Parnok Tsüngrem temoatsü nungi pila liasü aser parnoki tepela aser taküm nükjitong samadar ta Dawidi metetta liasü.

Asenoki asen telunglen aser tejangraba proker kümdi. Aseni kechi meimer aseni angutsü akok saka aji ngur külen asenoki jashitsü akok. Temenen prokba nung tepela alitsü akok saka iba aruba nung tepela mali. Khristantem nüktzü aser meranga inyakbaji teperokba nung lir, asenok tepela aruba nung ji alitsü. Saka shirnoki shi aser alima pelaba asoshi alir parnoki prokba nung pelateper aser aluruba nung tejashi angur. Taküm nung nai aginüba agira nai ibaji asoshi aatsüla.

Tanelaren tejangraba proktsü koda tongtipang- Tsüngrem o asoshi, sarasademtsü, nübur den alitsü asoshi aser külemtsü jangraba aser Tsüngrem tenzüktsü tejangraba nung liang.

Koba agi tanelaren indaktsür ibaji ne telung taküm nung prokang. Tsüngrem O agi mesüba aser Kibuba den jajaba ajanga azüokang. Ne tejangraba Pai amshia ne taküm nung aser tangar taküm nung Pai moatsütsü.