Kumlong CEM-i shisatokden sentong ayonga agi

Dimapur, August 1 (TYO): Kumlong Baptist Arogo Christian Education Ministry-i shisalen sayur tajungtem jaoka tanurtem asoshi mapang shia shisatokden sentongtem ayongzüka agir.
Taküm Christian Education Ministry-i shisalen sayur 9 jaok aser parnokji- Ayimba T Longchar (Cartoonist, Ao Milen), Rev I Lima Jamir (Pastor, KBA), Lanukumzuk, Longrangty Longchar, Lanumeren, Aongsen Aier, Nochang Longchar aser tesayurtem- Wapangchila o Nukshinaro nungertem liasü.
Tanurtem dang writing, social work, cartoon drawing, handicrafts, hygiene amala onük balala nungi shimtettsü ashi aser parnoki shimba onük shia shisalen sayurtem den Sunday school tesayurtemi yaritepa tesayubatem agüja liasü.
Kumlong Baptist Arogo kübok Kumlong aser Mongsenbai ward tem aiter aser iba arogo ya Mokokchung nung arogo tulutem rongnung ka lir.
Tanü KBA Christian Education Ministry-i ayongzükba shisatokden sentongji KBA Pastor, Rev I Lima Jamir-i temoatsü meshia sarasadema tenzük.
Iba sentong takok ngua agiba atema shisalen sayurtem, tanurtem aser arogo dang kanga pelar, ta CEM Associate Pastor, Ms Moanaro Imchen-i sangdong ka nung metetdaktsü.