Kumlong Ward Hon jubilee Oct. 8 nü amungtsü lemtet

Mokokchung, Chiteni/July 3 (TYO): 2019 October ita Hon Jubilee amungtsü renemer aliba dak sendakba nung jeli sentong ka ama Kumlong Ward Golden Jubilee Planning Committee den Kumlong Ward Council July 3 nü community hall nung 50buba ward foundation day mungogo. Iba sentong nung colony nung lenritem nem mapa balala lemzükja liasü.
Foundation day amungba mapang Kumlong Ward Council chairman Lanu Imchen-i, 2015 küm nungi planning committee züngsemtemi iba benjung asoshi bendanga agüja inyakba ngua kanga pelaba den temulung süa bilemba lemsatep. Pai ashiba agi, committee puri tang tashi inyakteta aliba ya imlaba dang nungi tali lir aser jubilee ya kanga mera keta mungtettsü imlar.
Kumlong Ward Golden Jubilee Planning Committee, secretary Tiatoshi-i sentepa aliba lokti dang taoba küm pongu tsüngda committee-i mapa balala inyaka aruba tem metetdaktsü. Paisa, planning committee-i, Hon Jubilee nüngtem nung tanurtem atema painting competition aser tsü mopung dak sendakba nung tangazükba balala agütsüba sentong amala inyaka aruba metetdaktsü. Maneni pai planning committee-i senotsü bendena indokba indang osang agütsü.
Kasa mapang nung planning committee convenor, Tia Longkumer, shiba lenisüba kübok iba sentong agi, pai July melena benjung amungtsü atema anogo October 8-i belener atuba kuli agüja liasü. Longkumer-isa, planning committee-i tensa jung junga asadangba sülen July ita ya tzüngluruwa teyalong asütsü anungji benjung amungtsü asoshi mapang tamajung asütsü, ta asatetba metetdaktsü. Maneni Mokokchung jila nung tsüngsangmongpu aser kaketshirtem o office-i aoertem temulungdang yur parnoki jubilee benjungmung ya October 8, 2019 nü agitsü atema telemtetba agi, ta pai ashi.
Sentong nung Kumlong Baptist Church pastor Rev I Lima Jamir-i tajungshi o tatsüka jembi aser jubilee takok ngua mungtettsü asoshi temoatsü meshizüka sarasadem, ta Kumlong Ward golden jubilee planning committee züngsem Longrangty Longchar-i sangdong ka ajanga metetdaktsü.