Kümshia Nov. ita PWDs anogo amongtsü

Kohima, November 10 (TYO): Brihostibarnü Disabilities Comissioner, Dr. Atha Vizol-i sangdong ka ajanga, Nagaland Baptist Church Council (NBCC)-i küm shia November ita tasembuba Deobarnü anogo nung Persons with Disabilities (PWDs) amongtsü lemtetogo, ta metetdaktsü.
Taküm iba anogomongji November 20 nü amongtsü.
Iba dak sentakba nung Commissioner-i NBCC dang pelaba lemsatepba den külemi pai NBCC kübok aliba Arogo ajak aser denomination balala kübok Arogo ajaki shi nung tangar memenepertem atema iba anogo shiteta amongtsü aser parnok nem sarasademtsütsü asoshi mepishia metetdaktsüogo.
2011 Census nung ajemdaker pai, Nagaland nung shi nung tangar memeneper nisung 29,631 lir, ta metetdaktsü.
Nagaland ya Khristan state ka lir, anungji nüburtemi PWDs indang osang meteta kümdaktsütsü atema Arogoi agitsü tongtibang shilem ka lir, ta pai ashi.
Comissioner-isa, PWDs atema aria bilemja lokti nung parnok agizüktsü, parnok sendoka metoktsütsüla aser tangar nema iba osang meteta kümdaktsütsüla, ta ayongzük.