Kümtetdakba Yisu Asoba Indang Nabera Lemsateber

~ Dr. Imti John, Chief Functionary of: Christ-Centred Reformation Movement of Nagaland & Youth Life Moulding Society (NGO)Dimapur: Nagaland -INDIA.

Temeshi Laishiba nung mezülusemba tatalokba karbo Greek aser Hebrew “Dar otsü” (Greek & Hebrew Legendary) aser “Mysteries of the Bible” nung shia lir. Tatishitsü agi: Robin ozü; Ochishir aser temeim aketba, tashi temetet nisung, YIHUDA nunger shishilembar (Businessman) tenüng agi- JONAS; tetzür ka tenüng agi (social worker)- SALUMI-i kinü YISU nem apenloktsüba ‘Sü’ (shawl); Roman sepoytemi Mary, Joseph aser asen kümtetdakba YISU tebsettsü arria aodang atalokba; Herod chubai pei “Hon-sujong” yoker (sensakertem pa kübok ayutsü tasa nung), iba yokzüji sensaker nem lema agütsüba; Roman nungertemi “AMONG” asem amongba:- (1) YISU asoba mong (2) YISU südaktsüba ‘mong’ (3) YISU shia aruba ‘mong’.
Roman Khristantemi Yisu asoba anogoji latetsü lemteb. Roman yimsü nung December ’25’ ji “ANÜMONG-SUN-DAY” monga aru. Yisui ashi, “Ni alima tesangwa” ta ashiba jiang tematiba tesangwa ta apiteta “ANÜMONG-SUNDAY” ji “YISU asoba” anogo ta melena amonger. Meimchir asoba alima record nung asen kümtetdakba Yisu Khrista asoba “Date of Birth” mali aser mangutsü- iba yagi-a Sayatenya (miracle) jangjar aser pa-ji “Tsüngrem nungi Tsüngrem aser Tsüngrem chir Tsüngrem” – AMEN!
TEBILEMTSÜ KAR:-
Temeshi Lai nung “SUNDAY” mongang ta masü saka “TEMESHI AMONGNÜ- HOLY DAY” mongang ta shia lir. Anungji YISU/ Laishiba dak amanger (Khristantem)-i “SUNDAY” ya “TEMESHI AMONGNÜ- HOLY DAY” mekümdaktsütetra, Nagaland Khristantem ya anti-Bible/anti-Christ Christian (A kind of Christians) ta kanga süksena bilemdi aser rabalen tamang nungi chichiba tamang dangi meyipdi.
Ner yimer/ozü yimer/par yimer Arogo ta masü saka Khristar Arogotem nung Pastortem: Category, grade, Senior/junior/Asst./Associate/Youth Pastor/Women Pastor etc- Post aika create masüyonga/mayuyong-a Yisui/Laishibai sayuba Sanneker mapa inyaktet nungbo; aser amangbapurtem Mongdang len-nirtem yagi-a kangabo atebatsüa/sangrasangchi sendongtem meyanglui aser Tsüngrem O angar pei-i mulungba/pilemba/jangraba mesüi, indang-indanga dang (pei asoshi mebilemi) Santem asoshi Tsüngrem O-i ashiba angaa inyaktet nungbo “Naga lima Khrista asoshi” sangtongba ya alima Kintem tsüngdang Takoksang TSÜNGREMI kodaka ajongketla ta tei temulung süsü medemi kü tamang tila yari sarasadema senzür.
Yisu alimai arur, pai ajak tabensa inyaka, tuyua aser sayua toktsür Arogotem aser ochi tamangertem nem nungdakba mapa ajak inyaktsü nongloka toktsür ogo aser Pa tanaben kodang arutsüar memetet! Talisa Pa melen inyaktsü Arogo (Khristar Arogo) yangera toktsür ogo- “Arogotem dang tanelai kechi ashir”? Arogotem, mongdangtem, tamanger lokdi tentettem koda??? Asenok takokba kong lir??? Naga nunger/ Aor-tem, Arogo nunger masüba/ madenba kwi; kong lir??? Naga nunger ajak Arogo nunger dang! Sannekertem, Mongdang len-nirtem,- Ner santem kong, koma aser kechi nung lir??? Tekolok tamang (Intellectual faith) nungi tanela tamang (Spiritual faith) dangi meyipang. Tanela tenük labokang; Arogo aser Mongdang (Chruch Association/Council) mitsa akangshiang; Alima tashi (wrong forces) anema nokdaktsüla; alima Nok/Nü (deathly/ Worldly weapons) metsübutsüla; Tsüngrem tsübuang aser tanela sobutsü sobuang. Ajak takoksang asen Kümtetdakba asenok den lir. Kibuba Yisui Arogotem aser Mongdangtem (ochi tamangertem) ajanga asen Naga lima alima Kintem tsüngdang ajongketa sayuner- Asenoki amangba “Yisu azü” nung tashi aser takokba (There is power and Victory in the blood of Jesus) ji ibaji lir- AMEN! AMEN! AMEN!
Joseph aser Mary kanga menur-ang (aonung) Bethlehem atong. Tanendak/ tanendaktsür mali kang damaseta, petsaperonga aser kechiang mesayang tensa ka nung lai- YIHUDA nunger, kanga tashi temetet aser temeim aketba shishilembar (Businessman) ka tenüng agi JONAS; pai pei kor (horse) yipdaktsütsü ‘Nashi Ki’ tazüng ka senbak 2/- li-melen (rent) agi yua liasü- Yangji Joseph aser Mary anendaktsü. Aji oda paonungji iba ‘Nashi Ki’ nungji asen Kümtetdakba Yisu aso.
Tetsür ka tenüng agi ‘SALUMI’ (social worker) kati tzürabur aser kinü tanur tiaji angu. Jerusalem nung putir nem sempet (gift) agütsütsü lai kanga dang nendaka, atakarua taker yua aliba sü (shawl) Joseph aser Mary nem tenla agütsü. Apiga oer SANNEKERTEM ‘Mi’ afur mendeba liasü. Sannekertem dang Joseph-i Mijang meshi-i ao. Pa sü (shawl) nungji Sannekertemi molungsoa agütsüba Mijangji yaoka bener aru. ‘Mi’ jagi ‘Sü’ (shawl) ji marong.
Iba Mijangji sebya lia Ozü ka (Robin ozü) yema arua ‘Mijangji’ apushitsü, aser iba talem jagi Joseph, Mary aser Kinü tanur (Yisu) lem-lema amuzüka odaktsü. Pongmang/ Mangdang nung- yakta desem dang-a kati ainshitsü Tsüngremi jembi. Itangjibo parnok arria aotsü Roman Sepoytem ayamesor liasü.
Kinü tanur (Yisu) ji ajonger kara- karaa mulungbo mejajateti parnok ‘Mitsüktsü dongzüng’ ka nung jenok; tenük mesepshi nung mepet temelem arua iba desem/parnok tongdangatok. Maneni Roman Sepoytemi parnok arria ao. Parnok ‘Ongken’ ka nung jenok. Iba ‘Ongken’ ya akidang Zütsüra (Leprosy) aketer ayuba ‘ongken’ liasü. Iba ‘ongken’ ji kenyongi ‘Sorakzü’ (Spiderweb) agi mesangbangatok.
‘Ongken’ nungi atoker jena aodang parnoki ‘Aluru’ telok asemsü ajangdanga ao Alurur’ dangji Roman Sepoytemi- “Kinü tanur aser tzüraburtem kodang süia ao” ta asüngdang. ‘Alururtemi’ langzü, “tang süia ao, odarji, nenoki menübtsü”. Roman Sepoytemi angapet, “Alu amentsü tenzükdang” Kolen mesüra koba meda/yim nung jenoka ali, terada agi sünger aser anisüker parnok pei chuba (Herod) dangi tamakok osang bener dhadaseta shilang. Tedenla nung aser tabi agi küm ana tekübok tebur chanu ajak tebsettsü Herod chubai azüng agüja tebsetdaktsü- Yangji-a asen Kümtetdakba Yisu-bo mamshi- Hallilujah!
Ibai kenyongi tejangja aser kaang kar: Shibaisa/shirnokisa pei taküm nung/lokti nung Yisu sodaktsür, pa/la/parnok den; (1) Robin ozü lir (2) Salumi sü (shawl) yuja lir (3) ‘Mi jagi sü (shawl) merongdok ama timtem, shisabolu aser makamait jagi kodang-a memetaktsü mesüra melaodaktsütsü; (4) JONAS-i li-melen (rent) agütsür yua aliba ‘Ki’ nungji na anisüngzüktsü; (5) Sorakzü jagiang süngla na kümzüktsü (6) Mepet jagi-a na awabang atoktsü (7) Komulongri aketer aser jentokbapur ayuba desem (ongken) ji-a na atemabo jenokdak tajungtiba asütsü (8) Kecha masü nung-a na arrishirjagi na memenebtsü, len tom nung parnok tashi dematoktsü aser meyiba oatoktsü.
Iba ocet tila azünger ajak Tsüngremi moajang aser pa wadang tulu asoshi temeim teber kümdakjangma- AMEN