Kupwara nung telungpur 5 tepset

Kupwara, May 21 (Agencies):  Tanü north Kashmir, Kupwara district nung security sepaitemi telungpur pongu kahsetogo, iba rara nung sepaia ana yiruogo.
Srinagar nungi kilometer 81 shi pilar aliba Kupwara kübok Drugmulla yim nung telungpur aliba osang ka lazükba sülen police aser army senteper iba tesemji mita ao. Security sepaitem jagi telungpurtemji meketbanger injang kaloktsüba sülen telok ana süngda rara tenzük, ta ketdangser kati ashi.
Kahtepdang telungpur pongu kahset aser sepai-a ana yirua hospital-i anir ao, ta ketdangserisa ashi.
Telungpurtem maitsüji tang tashi nungbo mejangja. Parnok ket nungi prangpong pongu ngutetogo, ta paisa shisem.