Kürakyanglu politics

– Among P. Aier

Tripura nung Left Front sorkar atsüngdokba sülen Lenin indang kürakyanglu kar raksatsü aser iba  sülen linük kübok tesem kar nung kürakyanglutem raksatsüba tensa ka ajuru. Lenin indang kürakyanglutem raksatsüba atema West Bengal chief minister Mamata Banerjee-i aitsü saka Kolkata nunga SP Mukherjee indang kürakyanglu ka raksatsü. Iba denji Uttar Pradesh aser Tamil Nadu nunga Ambedkar aser Periyar indang kürakyanglutem raksaja liasü. Iba mapang BJP national secretary H Raja-i Periyar indang kürakyanglutem raksatsütsüla ta olen ka jembi aser ibaji anema nisung kari Coimbatore nung BJP office ka petrol bomb amshia amak. Tatem nung Prime Minister Narendra Modi-i kürakyanglutem raksatsüba inyakyim aitsü aser home minister Rajnath Singh-ia state tem dang iba inyakyim noktangtsü atema tetuyuba agüja liasü. Ajisüaka, tenati ola madokdang BJP lennir kari kürakyanglutem raksatsüba pusema nungit aser Tripura governor Tathagatha Roy-ibo sorkar tasen kati tesüiba sorkari kati inyakbatem agientsü akok ta metetdakja liasü. Sorkar tasen aküm shia kürakyanglu tejentem raksatsü aser tasentem yanglura, taruba sorkari yamaji inyakdang sorkar tejenba jagi kechi shitettsü ta nisungtemi asüngdangtsü tenzük. Tanü India nung iba inyakyim tenzüka lir aser asen linük nung sorkartemi kürakyanglu tejentem raksatsü aser tasentem yanglutsübaji kanga dang jangrabangra inyakteper. Shitakba agibo asen linük nungi sensak tia agientsü, küm shia lanurtem nem mapa agütsütsü, China-Pakistan linüktem ajanga security tsütsü khurettem agütsüba atema mapa inyaktsüba aika lir sernung state aika nung sorkartemi kürakyanglutem dak ang temulung tagütsüba aser parnoki taküm alirtem dang nungibo tasürtem jiang tongtipang ama züngshir. Kürakyanglu tasentem yangluba nung sen crore aikasa endoker aser sensakertem atema school o hospital tem yanglutsü melena kürakyanglutem yangluba nungang amajok nung sen endoker. Tang Ahmedabad nung ‘Statue of Unity’ yangludar aser iba ya sen crore 3,000 crore shi endoka yanglutsü ta asadangteta lir, ano külen Mumbai nunga Shivaji kürakyanglu ka sen crore 3,600 endoka yanglutsü sentong lir. Talisa, ‘Statue of Unity’ ji Chinese aser Malaysian company temi inyaker ta osang angazüker aser iba tetezüji India-i pei sasa kürakyanglu tulutem meyangluteter aser iba jagi bendanger nem sen agütsür aser mapa inyakertema bendang linüktem nungiang anir arua inyaker. Ibaji rongsenkettsüng tsütsü linük asoshi takoksa rongnung ka lir. Tia ka, asen Nagaland state nungbo kürakyanglu indang politics ji tanü tashibo mali aser imlar Naga nungeribo tsümartem indang yimya ya ajizüka mebenshitsü. Ajisüaka, asenok asoshi tekümdangtsü ka lir aser ibaji asen state nung tangartem arua sorkar ketdangsübaren nung shilem agir aser shibai metet parnoki state kübok tesem balala nung kürakyanglutem yangluyonga aotsü sentong-a alitsü akok. Anungji, asenok Naga nungertemi kanga dang jeretpera alitsüla aser yamala mapaji inyaktsü tenzükra mesüra jembira, asenok longjemer ola adoktsü asoshi renema alitsüla. Nagaland nung politics tapu aika benoka lir, kar tajung kar tamajung aser tang asayaba politics yagi peridaktsür kürakyanglu indang politics yabo asen limai bener marudaktsütsü merangdi.