Kurd nunger telungpur 30 dak tema tepsetogo: Erdogan

Ankara, September 29 (Agencies): Turkey mitkartemi arrtsü adena telungpur mita yasüng, Hombar aonüng aoba sülen parnoki Kurd nunger telungpur züngsem 30 dak tema tepsetogo ta Turkey Tir, Tayyip Erdogan-i tanü Mongolbar nü metetdaktsü.

Ajisüaka, tanü Ankara kübok presidential palace kilung nung lokti tentet balala nung lenirtem den ajurusang, Erdogan-i tan telungpur tepsetba maparenji koba tesem nung inyak iba osang tejangjabo memetetdaktsü.

Telungpur den agiba yimjung tezüngzüktep taküm July ita agienba sülen Turkey mitkartemi Turkey southeast tsütsülen aser arrtsü adener, Iraq anüdoklentip tsütsü tenemlen tesep tentetba Kurdistan Workers Party (PKK) telungpur anema kanga sashia raraba osang bushiteta lir.

“Ozü mitkartemi ozü lushi aser arrtsü adener kidangsüa aliba tesem aika nung telungpur anema tang teraradak lir. Ozü mitkartemi yasüng arrtsü adena aoba sülen PKK telungpur züngsem 30 dak tema tepsetba osang jangjaogo,” ta Erdogan-i nenshia ashi.

Turkey southeast tsütsülen densemba tesemtem nung tesep tentetba PKK telungpur den agiba yimjung tezüngzüktep agienba sülen tanü tashi nung Turkey mitkar aser PKK telungpur züngsem noklang aika asüba osang bushiteta lir.

Ano, par mitkartemi Turkey southeast tsütsü Hakkari province mita aoba sülen idakji atsüka alir PKK telungpur züngsem 6 tashi tepsetba den külemi, par miktar tayimtsü amshia Iraq anüdoklentip tsütsülena PKK züngsem 19 tashi taoba hopta tepsetba osang ka Turkey mitkar lenirtemia metetdaktsüogo.

Kurd kin nisungtem kanga lungsoa alidak, Turkey southeast tsütsülen Bismil jila nunga PKK telungpurtemi rocket ka kalokja taoba Deobar nü amakdang arishi küm 9 tain tetsür chanu ka asüba osang jangjaogo.

Turkey anülulentip tsütsü Adana province nunga PKK telungpurtemi police ketdangser 2 tashi yasüng, Hombar aonung tepsetba osang bushiteta lir.

1984 küm nungi tenzüka Kurdish lima tasen ka tentettsü merangba PKK teloki Turkey sorkar anema nokdaktsü tenzükba sülen tanü tashi nung ishiba agi nisung 40,000 shi Turkey nung asüba osang bushiteta lir.