Kütsü ajanga ni iba jenjang tongtet: Sridevi

Chennai, June 25 (Agencies): Actress Sridevi-i tang tashi tongteta aliba jenjang aser lai takok ngua film industry nung shilem agiba atema tetsü nem tenüng agütsür.
Mom film sayatsü anogo ishika lia, osangbenertemi Sridevi dang tetsü Rajeswari den la tesentaktep koma lir ta asüngdangdang, lai taküm nung takok angubaji tetsü ajanga lir, ta langzü.
“Ni tanü iba jenjang tongtetba aser ni inyaktetbatem ajak ya kütsü ajanga lir. Lai kü taküm nung tongti shilem agi. Kütsüi kü dang sayuba nungi ni shilem 50 danga ozü jalatem dang sayutetra, ni kanga pelatsü” ta Sridevi-isa metetdaktsü.
Ravi Udyawar-i direct asüba Mom film nung Sridevi-i aiür chanu ka tetsü ama shilem agir.
“Iba film otsü ajanga kü mulung nung kanga kongshi. Ni tetsü ka asübayong, ni kü shilem tajungba nung angatet. Iba film ya tetsütem aser parnok jalatem atema kanga tongtipang film ka lir” ta laisa ashi.
‘Mom’ film ji July 7, 2017 nü sayatsü aser iba film nung Nawazuddin Siddiqui, Abhimanyu Singh aser Akshaye Khanna nungertemia shilem agir.