Kuwait-i nisung 7 nem tasüba temerenshi agütsür

Kuwait, September 15 (Agencies): Kuwait nung tentetba okadak kati aibelener nisung 7 nem tasüba temerenshi tanü Mongolbar nü agütsüogo.

Shi’ite kini Kuwait City nung tentetba mosque nung taküm 2015 June ita bomb lendong tesashi ka atalokdakja ishiba agi nisung 26 poksetba den külemi, nisung 227 shi yirutsüba ken o nung aitsüba sülen par 7 nem tanü iba obendangji agütsü.

Imam Sadiq Mosque nung lendong atalokdaktsüba ken o nung ajemdaker külen aibelener ta temulung melemi bilemba nisung 29 tashi anema okadak ken o benoka liasü.

Aji oda, parnok anema benokba ken o angadangba sülen, par 7 nem tasüba temerenshiji agütsütsü, parnok 8 nem tepuokdak küm 2 nungi 15 tashi puoka ayutsü o bendang agütsü aser tanüngba nisung 14-i aibelena meinyakba kuli bushiteta parnokji chiok.

Tan merenshir rong nung Kuwait nunger 7, Saudi Arabia nunger 5 aser Pakistan nunger 3 densemba osang jangjaogo.

Taküm June ita lendongji par teloki atalokdaktsü ta shia, Islamic State (IS) kiralongrar telok den sentaktepba Najd Province teloki lendong atalokdaktsüba atema tenüng agia metetdakja lir.