Kuwait nung totzü aika yimshir

Kuwait City, August 13 (Agencies): Gulf nung Kuwait aser Saudi na külemi totzü atsüba tesem nung totzü aika yimshia ajungben lendong nung yariteper temi Deobarnü iba takoksa tuluba mükümdaktsütsü asoshi inyakdagi.
Southern Kuwait tzüküm nung Kuwait aser Saudi indang Al-Khafji oilfield nungi totzü adokba ya tzüyim nung yimoker, saka iba indang kuli ketdangser shingaia magütsüi lir.
“Emergency oil team ajanga Kuwait southern tsütsü aliba Ras Al-Zour tesem nung-i totzü yimshiba anu menokdangteti lir,” ta Kuwait Petroleum Corporation odongtar, Talal al-Khaled-i osangbener dang ashi.
Al-Khafji nungi totzü abenba pipeline tejen kilometre 50 talang nungi totzü ya yimshir südi, ta iba tesem nung aliba mongin temi ashir.
Anogoshia totzü barrel 615,000 atsütsüba asoshi sen billion $30 jenjang oil complex ka Kuwait-i tang teyangludak aliba tesem anasa aliba Al-Zour tzüyim nung crude oil barrel 35,000 yimoker alitsü südi, ta ashir.
Kuwait south nung Gulf tzüküm len aliba Saudi Arabia aser Bahrain indang tzünük bo iba totzü agi anu madong, ta ashir.
Aji süaka iba totzü yimshiba nungi kümzüka alitsü asoshi Saudi Arabia-i tzüküm len tayimtsü nungi mita repranga terenemshiba nung lir, ta ketdangser ajanga ashi.
Saudi Arabian Chevron aser Oil Spill Response Limited ajanga tzüküm nung aliba tzü merekteter, ta Kuwait Petroleum Corporation ajanga ashi.
Totzü aser gas aika adokdaktsüba linük rongnung Kuwait ya ka lir aser par linük nungi tanga linüki oset balala bener oa ayokba nungi sen aruba shilem 95 bo totzü aser gas nungi arur.