KVC-i municipal nung tetsür shilem magizüker

Dimapur, Sept. 22 (TYO): Brihostibarnü Kohima Village Council (KVC)-i,  state municipal nung Nagaland sorkari latetba ama tetsürtem nem shilem 33 lemzüktsüra tensa raksatsü, ta sorkar dang metetdaktsüogo.
KVC chairman, Medoselhou Keretsü aser press secy., Thejao Sekhose nati, municipal election nung tetsür atema shilem 33 lemzüktsüba anema lokti tentet balalai kanga nokdangtsü merangaka state cabinet-i Naga nunger telok tentettem den olemtep kecha makai aser masüngdangtepi August 2016 nung ‘Women Reservation Bill’ renema ayu, ta sangdong ka ajanga parnoki metetdaktsü.
Anungji tetsür medeni municipal election tekaratiba nung agitsü parnoki takhangba ka agütsü, kechiba süra town aser municipal committee maliba ajanga takoksa jenti alur.
Tetsür nem shilem lemzüka yutsüba ya ‘Naga nunger sobaliba anema lir’ aser parnok atema ‘Ya kodang mebenshiba yimya ka’. Temzüng arrla 371A(1) nung Naga nunger loktiliba, tamangba aser sobaliba wazüka ayutsü shia lir, ta parnoki ashi.
Tetsür temeten atema inyaker aser Naga Mothers Association advisor, Rosemary Dzuvichu-i, Supreme Court-i melaba ama iba election nung tetsüri shilem agiba ajanga Naga nunger sobaliba nung timtem magütsütsü; Court-i iba temelaba ya  74th Amendment of the Constitution dak ajemdaker pei jila aser yimtitem nung municipal ajanga terenlok mapa inyaktsü tashi agütsü, ajisüaka tang atalokbatem ngua kanga sasa bilemer, ta ashi.
Kohima-a smart city rongnung züngokogo  aser inyakyim nung alibaji reprangdangra, smart city project temji municipal ka kübok inyaktsü shia lir, ajisüaka Kohima nung joko küm 5 tashi municipal election magi-i dang arur.
KVC-i, “Tebur aser tetsür tsüngda kecha tebendang mali aser loktiliba nung Naga tsürtemi kecha nunga maongka manguba mali,” ta ashi.
Sahitya Academy award angula aser kaketzülur, Temsula Ao-ia, telemsa nokdangtsü atema tetsürtem atema lemzüktsüba shilemji mapa aküm nung ajungtsü, ta shiogo.