Kvitova-i ita 6 tashi tennis masayatettsü

Prague, December 22 (Agencies): Kotari abener auer kati tawa teka yirutsüla, Czech Republic’er tetsür tennis asayar mongin, Petra Kvitova-i taruba ita 6 tashi tennis toktepa masayatettsüsa akümba osang ka lar ketdangser, Katie Spellman-i tanü, Brehostibar nü metetdaktsüogo.
Lar kilungi aitba auersang den nungtepa raradang, taoba mapang Wimbledon champion akümtsü jenjang anaben tashi ajangzükla, Kvitova teka abelen kanga mejungi tan Mongolbar nü yirua liasü.
La yiruba teka takok ngua operation agiba sülen tetsür World No. 11, Kvitova-i taruba ita 6-8 shi taneptsü bushia anisüngzüktsüsa tang tia ajurua lir.
“Kvitova tan lendong nung kanga mejungi yiruogo. Ajisüaka, osang tajungji lai ita 6 sülenbo tanaben tennis toktepa asayatsütettsüji lir,” ta Spellman-i sangoktsü.
“Kvitova ya tashi tait asayar tajung ka lir saka la tan kanga mejungi yiruba yong lai taruba 2017 küm tom tashi tennis toktepa masayatettsü akok,” ta Kvitova teka nung operation agitsür surgeon, Radek Kebrle-ia tan Bodbar nü metetdakja liasü.
“Kvitova-i tarutsü ita ishika tennis toktepa masayatettsüsa akümba osang angazüka, kanga sasa bilemtsür. Lai tekaratiba nung taneptsü ngua, tanaben tennis toktepa asayatsü imlar,” ta alima ajunga nung tetsür tennis asaya ayonger, Women’s Tennis Association (WTA)-ia metetdaktsü.
Arishi küm 26 tain, Kvitova-i mezüngbuba Wimbledon singles takok marok 2 tashi agizüka kanga junga asayatsü tenzükba sülen la 2011 küm tetsür World No. 2 aküm aser iba mapang nungi tenzüka, Kvitova-i tetsür asayar tarensen nung temaba jenjang 10 abener asayar rongnung densema aruogo.