KVYO-i Hornbill benjung mokdangtsü amokmerener

Dimapur, November 11 (TYO): State sorkari security tebilemtsü nung ammeter Dimapur nung Hornbill Rock Festival amungtsü lemtetba atema kanga aoksar aser iba atema Kohima nung Hornbill sentongtem ajak mokdangtsü ta Kohima Village Youth Organization (KVYO)-i amokmerena metetdaktsüogo.
Küm aika security tebilemtsü kecha melii dang Kohima nung Hornbill benjung mungyonga arur, anungji koba tesem nungsa security khuret ajurua ali’ar onoki metetnür, ta KVYO-i asüngdang.
State sorkari iba o jembiba ajanga Kohima nung alirtem temulung yirutsüogo anungji iba sentong Kohima nungi tangaleni belena aotsü sentong matongtsüla, ta KVYO-isa ashi.
Kohima village-i state yimtiba akümtsü atema ali kanga dang mulungsoa tenla agütsü aser Kohima ya Naga nunger ajak atema lir, ta parnokisa shisem.
Tanga district tem nung Hornbill benjung rashia aotsüba nungbo KVYO-i menokdanger saka state sorkari security onük nung ajemdaker tangaleni bener aotsü ta jembiba metentsü atema kuli kecha mali aser iba amai jembibaji sorkar inyaksangshi den meputep.
State sorkari Kohima nungi tangaleni belena ora, KVYO-i December 1-10 tashi Kohima nung Hornbill benjung mokdangtsü, ta parnoki amokmerena ashi.