KVYO-i Kohima nung ango ayokba mittsü

Dimapur, March 3 (TYO): Food Safety Cell, Health & Family Welfare Department-i telatetba agütsüba ama ango aser tzü nung anguba shirurutem ayoktsü tuyur, ta Kohima Village Youth Organization (KVYO)-i metetdaktsü.
Kohima aser temeket nung Formalin adenba ango ayokba putetra, ozüng tesashi agi merenshitsü, ta parnokisa ashi.
Nagaland nung Formalin enokba ango mapang shitak nung noktangba atema Principal Secretary & Staff, Food Safety Cell, Health & Family Welfare Department aser Kohima Municipal Council ketdangsertem dang kanga pelar, ta KVYO-isa metetdaktsü.
KVYO-i Kohima nung alirtem temang anema alibaren atema bilemtsür aser bangdak Department den yariteptsü. Maneni bangdak ketdangsertemi ozüng alema mapa inyakba mita aotsü aser ozüng tapet agi merenshitsü ayongzüker, ta parnokisa shisem.