KYO-i ganja aika rongdoktsü

March 12, 2017 nü Kohima district kübok Kiruphema nung Kiruphema Youth Organisation (KYO) züngsemtemi ganja raksaa rongdokba noksa nung angur. 

Kohima, March 12 (TYO): State yimtiba, Kohima district kübok anogoshia National Highway 29 nung gari aikati Kiruphema yim telongtet ajanga senzür, aser tanü Kiruphema Youth Organisation (KYO)-i ganja aika puogo.
KYO intelligent team aser action committee-i osang ka lazükba nung ajemdaker lanurtemi mejangjaba shibelener nisung kari gari lenmang kübok ganja aika miima ayubaji angu. Itemji aou agi atakba khang noklang aika nung miima liasü.
Action Committee KYO Chairman, Makolie Suosahie-i ashiba agi, ganja seret 500 shiji taseptsü 110 nung liasü.
KYO lenisüba nung Kiruphema nung village council, tetsür tentet aser kaketshir tentet matsüngdang ganjaji raksaa rongdokogo.
KYO-isa, iba ken o nung densema alirtem nem temerenshi agütsütsü ta amokmerenba den külemi sensotem dang tesem nung tashishitsü osettem mita alitsü ajungshi.
KYO Tir, Kezevilie Hojha-ia, Kirupema yim ya item ama tashishitsü intoktsü tesem ka masü, anungji tarutsü nung item ama nung aibelenertem putetra la/pa kija khuret asütsü, ta metetdaktsüogo.