KYO-i gari lenmang yanglushiba nung tanurtemi yaritep

Kohima, Rongjui/September 03 (TYO): Tzünglu maneni aruba ajanga tesüiba hopta ishika NH-29 nung Kiruphema aser Kohima kübok gari lenmang kanga mejungi lir, aser KMC dumping area tejenbabo khenyongi raksaba ajanga ainlen senzürtemi timtem kanga ajangshiogo.
Ita aika garitem Kiruphema village jurisdiction ajanga dang senzüa Dimapur nungi state yimtiba aser Manipur state den sendaktep.
Iba dak sendakba nung tanüa Kiruphema Youth Organisation (KYO)-i gari lenamng yanglushi aser Peducha o Kiruphe Bawe/Basa na tsüngda lenmang ulushia liasü. Tanü lenmang yanglushiba nung yimtsüng nung aliba tanurtemia shilem agiogo, kechiyong joko iba lenmang agi gari aika senzüba metizükteter aser gari nung senzürtem lendong ajurutsüsa lir.
Tanü gari lenang yanglushiba maparen nung shilem agir driver kati, “Nisung karibo lenmang yanglushitsü atema meranga inyaker, ajisüaka zünga alir lanur aikati social media nung tenemnem dang nemnemer,” ta ashi.
Paisa sensotem dang Nagaland nung lenmangtem yanglushiba nung ano mera tali agia inyaktsü ayongzük.