KYO & SMC nati 3 buba Kohima District Volleyball tournament takok marok agizükogo

Dimapur, October 26 (TYO): Kiruphema Youth Organization (KYO) aser Shürho Mountain Club (SMC), Kezo Town nati 3 buba Kohima District Volleyball Tournament asayamong tebur aser tetsür na shilem indang takok marok agizükogo.
KYO teloki senpet sen 30,000 den külemi, takok marok aser kulikaket agizük aser Prancers Phesama (PP) teloki tanabuba takok marok aser kulikaket den külemi, senpet sen 20,000 agizük.
Semifinal nung shilem agitsü jenjang anguba telok ana, Striking Tenth Zhadima (STZ) aser Kezo Town Youth Society (KTYS) telok naprongla nem senpet 5000 agüja liasü.
KYO telok nungi Lhouvizolie aser PP telok nungi Vikehiezo nati tebur shilem indang best setter aser best spiker jenjang ngua tenapronglai senpet sen 2000 agizük.
Tetsür shilem nung SMC teloki takok marok aser kulikaket den külemi, senpet sen 20,000 agizük aser Elite Sisters Club (ESC) teloki tanabuba takok marok o kulikaket den külemi, senpet sen 10,000 agizük.
Elixer Club Kezoma (ECK) aser Khonoma Youth Organization (KYO) telok natia semifinal nung shilem agitsü jenjang anguba nüngtem nung telok anaprongla nem senpet sen 5000 agütsü.
ECK telok nungi Mhasivino Kuotsu aser ESC telok nungi Khavili Kive nati tetsür shilem indang best setter aser best spiker jenjang ngua tenapronglai senpet sen 2000 agizük.
Tanü asayamong shibangba sentong nung tetushi tesemdanger, Chairman, Nagaland State Mineral Development Corporation Ltd & MLA, Dr. Neiphrezo Keditsu-i takok angur nem sempet aser senpettem lemshia agütsü.
“Iba asayamong ayonga agiba atema tayonger dang pelaba metetdaktsür. Nagaland state asoshi takokba aser konang bener arutsütsüsa sempet tajung alir asayar jenti lir anungji, parnok nem terenemshiba agütsütsü atema special coaching camp balala mapang shia ayonga agitsü ajungshir,” ta Neiphrezo-i tesülen metetdaktsü.
Kohima District Volleyball Association (KDVA)-i ‘Transcending through sports’ omen nung ajemdaker ayongba 3 buba Kohima District Volleyball Tournament asayamong nung telok 26-i shilem agia liasü.