Kyrgios Australia Davis Cup team nung züngoksemogo

Sydney, September 6 (Agencies): US Open nung tapu tachichi yirua asayamung nungi tuguadokaka, World number 17 Nick Kyrgios, Belgium den Davis Cup semi-final asayatsü aliba nung Australia team nung shimokogo.

Arishi küm 22 tain tennis asayar ya US open mezüngbuba round yirur makok tuguaka captain Lleyton Hewitt-i odang shimokogo aser pa Thanasi Kokkinakis, Jordan Thompson aser John Peers nunger den külemi asayatsü.

September 15 nungi  17 tashi Brussels nung Belgium den asayatsü aliba ya indoor clay court ka nung asayatsü.

“Onok iba asaya atema küm tepiyong renema aruogo aser team nung züngsem ajaki Davis cup ya parnok schedules nung tongtibangtiba ka kümdaktsüogo,” ta Hewitt-i ashi.

Kokkinakis yiruba ajanga ita 18 tashi masayateti lir Sam Groth melena Davis Cup nung shilem agitsü. Sam Groth quarter-final nung Unitet States akokba telok nung densama liasü.

“Thanasi-i Davis Cup team nung teti kanga temolung agüja asayar aser pa 2017 küm asayaba ajanga ibaji jangjatsür,” ta Hewitt-i ashi.

Kokkinakis asayatenzükba nung tanem tanemi jenjang tajungba küma atudar aser pai temaba jenjang 20 nung aliba asayar Milos Raonic aser Tomas Berdych nungera koka Los Cabos nung mezüngbuba kicha asaya final tongtetogo.

Australia nungeri 2003 küm tatembangsa Davis Cup final tongteta lir kong Hewitt, Mark Philippoussis, Todd Woodbridge, Wayne Arthurs aser captain John Fitzgerald nungeri Spain 3-1 agi Melbourne nung koka liasü.

Parnoki Belgium akok nungbo France mesera Serbia den November ita Australia nung final asayatsü.