Kyrgyzstan-i EU den sentakteptsü mulunga lir: Atambayev

Bishkek, July 14 (Agencies): Kyrgyzstan linüki European Union (EU) den sentakteptsü mulunga aliba olen  ka Kyrgyzstan Tir, Almazbek Atambayev-i tanü, Brehostibar nü metetdaktsüogo.

Par linük semdangla, German Chancellor, Angela Merkel den ajurutepa senden ka amendang Atambayev-i tanü iba olenji metetdaktsü.

Par linüki EU den sentaktepa alitsü jangraba ajanga taoba mapang Russia den tesendaktep junga ayuba Kyrgyzstan linüki joko West den ang sentaktepa alitsü jangraba kuli angur lir.

Taoba mapang aroki lungjemer inyaktsü renemba dollar sen billion jenti jenjang aketba Kyrgyz hydroelectric power mapatong meinyaktsü asoshi Russsia-i yaküm, 2015 küm tatembanglen agishiba sülen Kyrgyzstan linüki joko West den sentaktepa alitsü bushitsü tenzüker lir.

“Shishilembatsü jenjang tajungba küma temalen ajungkettsütsü nükjidong nung kidangsüa aliba Kazakhstan linüki EU den taküm 2016 küm tetenzüklen agiba ama, ozü Kyrgyzstan linükia EU den shishilembatsü tezüngzüktep agitsü mulunga lir,” ta Atambayev-i nenshia ashi.

Ano, West talisa, US peladakja West den tesendaktep tajung ayutsü nükjidong nung Kyrgzstan linüki meimchir temeten atema nokdaker, Azimzhan Askarov nem agütsüba temerenshi tanaben reprangshitsü tenzükba osanga angazükogo.

Kin kidong ken o nung mangatettep adokdaktsüba aser lokti tentet rong nung makmakshimak adokdaktsüba ken o nung ajemdaker Askarov nem taküm tepiyong tepuokdak puoka ayutsü temerenshi agüja lir.

Ano külen, US State Department-ia kümshi agütsüba Human Rights Defenders Award Askarov nem yaküm agütsü aser ibaji ajanga par linük ana tsüngda tesendaktep mejungi akümtsü tenzük.

“EU den tesendaktep junga ayutsü maparen nung ni Kyrgyzstan linük pusema nungitsü renema lir saka EU den sentaktepshitsü asoshi jembitsüji melarabo masütsü,” ta Merkel-ia metetdakja liasü.