L Birendrakumar Singh nem Padma Shri award agütsü

Imphal, April 30 (Agencies): Manipuri musicologist, arishi küm 97, Laishram Birendrakumar Singh nem tawa Padma Shri Award agütsü; iba award ya linük nung civilian award temaba jenjang pezübuba nung lir.
Temang manemi aliba ajanga pa Delhi-i iba sempet agizüktsü atema mouteti liasü.
Honibarnü Chief Secretary, O Nabakishore Singh-i par kidang pa nem iba sempet agütsüba sülen Birendrakumar-i, “Ni kanga pelar. Scientific tsütsü nungi ni Manipur nunger sobaliba kenten kanga nendaka study süogo. Iba akhümket sempet anguba tetezü, India sorkari kü mapa tajung reprangtetogo,” ta ashi.
Paisa ashiba agi, sobaliba kenten angazükba ajanga state nung lokti balala tsüngda apo laja tesünep ajungkettsür.
Lanuwa nungi pai sobaliba kenten nung temelung kanga agütsü, aser iba dak sendakba nung Birendrakumar-i, pei maitsü aser sobaliba nem akhüm agütsüba temaitsü, sobaliba kenten nem tim akhüm agütsütsü nüngdak, ta ayongzük.
Meitei sobaliba aser maitsü wazüka ayutsü atema nisung kati sobaliba kenten angatettsü nüngdaker, ta paisa ashi.
Taoba mapang Birendrakumar-i Sangeet Natak Akademi award-a agizükogo aser pai, lanurtemi sobaliba kenten angazüktsüla, kechiyong iba nung ya shisatsü lir, ta ashi.
Ano Chief Secretary, O Nabakishore-ia Birendrakumar nem tenüngsang agüja, nai state nem konang bener arutsüogo, ta ashiba den külemi tarutsü nung nai Padma Bhushan aser Padma Vibhushan awards-a angutsü imlar, ta ashi.