L K Advani Tir mekümdaktsütsü atema Ayodhya ken o asentenshir

Patna, April 19 (Agencies): Bodhbarnü Rashtriya Janata Dal (RJD) tongti, Lalu Prasad-i, Ayodhya nung Babri Masjid raksatsüba ken o asentenshibaji L.K. Advani India Tir mekümdaktsütsü nükjidong nung inyaker, ta ashi.
“CBI ya sorkar indang kongsang ka lir; sorkari kechi tuyudir parnoki ibaji inyaker. Iba ya yimtenren nung tasa tamajung ka yangluba ka lir,” ta taoba mapang Union Railway minister aser RJD tongti, Lalu Prasad Yadav-i ashi.
“L.K. Advani Tir shimtsüa akok ta onoki angazüker. Tangbo shingaia pa shimtsü atema mejembitsü,” ta pai ashi.
“VHP (Vishwa Hindu Parishad) aser RSS (Rashtriya Swayamsevak Sangh) ya telok tamajung lir aser parnoki par nisung atema-a mebilemer,” ta paisa ashi.
Bodhbarnü Supreme Court-i Babri Masjid raksatsüba ken o nung BJP lenirtem- Advani, Murli Manohar Joshi, Rajasthan Angh Kalyan Singh, Union Minister Uma Bharti nunger den tangartem anema ken o agüja aliba asentenshiogo.
CBI-i Supreme Court dang parnok anema ken o akatsü mepishiogo.
Tamalen Allahabad High Court-i parnok anema ken o benoka aliba agienogo.