LA Galaxy coach asütsü Barros Schelotto shimogo

Aenjeti/January 3, 2019 (Agencies): Taoba Boca Juniors caoch Guillermo Barros Schelotto, Los Angeles Galaxy coach asütsü shimba club sangdong ka ajanga Bodhbarnü metetdaktsüogo.
Taoba ita Boca pur Copa Libertadores final tonga aniba sülen Barros Schelotto, 45 tang Major League Soccer nung denogo.
Barros Schelotto-i taoba mapang nung Boca pur Argentine Primera Division championship takoki anaben tashi aniogo.
Pa Lanus nung season asem tashi inyakba mapang Copa Sudamericana dena koktetogo.
“Ni Major League Soccer nung club tongtibangtiba rongnung ka nung head coach ama inyaktsü asoshi maongka anguba atema kanga pelar,” ta Barros Schelotto-i ashi.
“Iba ya kü asoshi maoangka ulura aser mapa tenzüktsü kanga yongyaa atar. MLS nung LA Galaxy puri mapang talangka takok tajung ngua arudar aser ni iba club maneni temabai ajungkettsü atema renema lir,” ta paisa ashi.
Barros Schelotto MLS-i arutsüba sendaktepa liasü ta taoba hopta osang ajanga metetdaktsü.
Maneni pai Argentina nunger Gerardo “Tata” Martino melena Atlanta United head coach mapa belenzüktsü imlaa liasü.
MLS ya Barros Schelotto atema tasen masü. Pa Columbus Crew nungi season pezü tashi asayaogo aser iba mapang nung 2008 küm MLS Cup dena benogo.
“Bendanglen aser kidang nisung tapet ka bushiba sülen onoki club asoshi Guillermo tetemsü asütsü ta apitet,” ta Galaxy general manager Dennis te Kloese-i ashi.
“Guillermo ya takoker ka lir shibai coach ka ama aser asayar ka ama club tulu nung shilem agia takok tulu nguogo. Guillermo inyakyim aser pai MLS jangjaa aliba ajanga LA Galaxy fan aser Los Angeles yimti nem takok marok aika bener arutsütsü onoki imlaa atar,” ta te Kloese-i shisem.
LA Galaxy puri MLS Cup ponguben tashi benogo saka taoba season ana nung parnoki playoffs tonga masayateti arudar.