Madrid, September 25 (Agencies) : Tan La liga nung FC Barcelona-i 5-0 agi Sporting Gijon madak takok anguba ajanga telok nung Messi meliaka junga asayatettsü ta sayutetogo. Iba asaya mezüng tesadang nung Luis Suarez aser Rafinha nati goal kaka yokba nung amendaker asaya tatem tashi nung par teloki goal 5 yok.
Messi yirur aliba ajanga pa medeni asayaba mapang Bodhbarnü par tesem nung Atletico Madrid den 1-1 agi draw asüba sülen Honibarnü Barcelona coach Luis Enrique-i telok nung temelenshi pezü bener aru, ta Xinhua osang ajanga metetdaktsü.
Iba asaya tenzüker minute 25 tashi Barca teloki bilemba ama kanga junga masayatet.
Ajisüaka minute 29buba nung Arda Turan-i Sporting Gijon defender tem kolak ajanga ball ka agütsüba Luis Suarez-i goalkeeper Pichu Cuellar paidoka lur goal yokba sülen nungi asaya khenyongi melenshiatok.
Iba goal yoker minute ana dang lir sülen Rafinha-ia tekolak agi ano goal ka yoksem.
Tanabuba tesadang nungibo football asayaba masü foul timba reprang kechiba süra Sporting teloki par tesem nung asayba maongka agiatsü meranga Barca telok amokbangtsü merang. Parnoki tim mesüi asayaba ajanga par telok nungi nisung ka yellow card anaben anguba agi red card agütsür asaya nungi anendaktsü.
Tanabuba asaya tesadang minute 9buba nung Neymar-i goal ka yoka 3-0 kümer lia ano Arda Turan-i tekolak agi goal ka yoka 4-0 aküm.
Iba sülen ano Neymar-isa goal ka yoksema parnoki iba asaya agi 5-0 agi takok angu.
You must be logged in to post a comment Login