Labour Commissioner-i ken o jangjashitsür

Dimapur, Luroi/August 29 (TYO): Labour Commissioner, Nagaland, Er. S.L. Wati Aier-i sangdong ka ajanga, tetsürtem aonung mapa inyakdaktsüba dak sendakba nung Nagaland Shops & Establishments Act, 1986 Section 20 dak ajemdaker ken o jangjashitsüogo.

Paisa, Nagaland Shops & Establishments Act, 1982 kübok Section 20 dak ajemdaker Nagaland nung tang tetsürtem aonung mapa meinyaktsü atema tenokdangba agüja ozüng kecha benoka mali, ta ashi.

Teküboklen agüja aliba onüktem dak ajemdaker tetsürtem aonung 7 ako adena mapa inyaktettsü.

1. Voluntary Consent – aonung mapa inyakba ya tetsür shiba mapa inyaker la mulungka nung asütsüla aser lai tezüluba nung temelaba agütsütsüla.
2. Kümzüka toktsütsü atema jenjang agitsütsüla – Senzüsenpongtsü atema gari kanga junga anepalutsütsüla aser parnok senzüsenpongba mapang aser office nung mapa inyakba mapang tekümzükba kübok toktsütsü atema lighting aser security kanga junga anepalutsütsüla.
3. Labour Laws sülen anidaktsüla – Act aser iba den apet labour temzüng ozüng kübok Mapa inyakba mapang, mapang talila mapa inyakba, mapa tinyakdak nung anisüngzükba mapang aser weekly holiday amala inyakyim sülen tashi anga anidaktsüla.

Maneni Labour Commissioner-i, ken o jangjashitsüba ya benoka inyaksangshi tenzüktsü, aser iba osang ya ken o dak sendaka aliba ketdangsürtem nungi temelaba agir sangdongba lir ta metetdaktsü.