LAC: India & China na senden 15buba March 11 nü amentsü

New Delhi, Metsüremi/March 8 (Agencies): Ladak nung mangatettep adoker aliba süngjemshidaktsütsü atema India aser China na March 11 nü senden 15buba amentsü renemer lir. Iba senden nung Line of Actual Control (LAC) nung mangatetep adoker aliba tesemtem nung ken o bentettsü asoshi rangloker sensak asemtsü imlar, ta ken o jangja aliba ketdangsürtemi Mongolbarnü ashi.

Corps Commander jenjang nung sensaksem ya tatemsa January 12 nü kaogo, ajisüaka ken o takok ngua sensak mesemtet, saka linük anapronglai ajaki agizüktettsüsa arrtsü nung mangatetep aliba bentettsü asoshi maneni inyaktsü ta shiogo.

March 11 nü sensaksem ya India tsütsü Chushul-Moldo meeting point nung amentsü, ta ketdangsürisa metetdaktsü. Galwan, Pangong Tso aser Gogra Heights nungi sepaitem anintsü atema senden asemben tashi menaka item tesemtem nung advanced weaponry den sepai 50,000 nungi 60,000 shi tang tashi mainshi lir.

March 11 nü amentsü aliba senden nung Hot Springs mesüra Patrol Point-15 nungi sepaitem anintsü atema sensaksemtsü imlar.

Hot Springs nung India Army patrolling inyakyim nung kongshiogo aser Depsang Plains nung Chinese People’s Liberation Army munga aliba ajanga India Army lenmang nung tetsükdaktsü adoker kong PP-10, 11, 11-A, 12 aser 13-i aoba lenmang densema lir.

Telok anapronglai sepaitem anintsü atema maneni sensak asemba ya osang tajung ta taoba Northern Army commander Lieutenant General DS Hooda (retired)-i ashi.

January 12 nü senden amenba sülen India aser China nati külem sangdong ka ajanga, taoba mapang mulungtepbatem ka küma yanglutsü aser security aser stability atema jenjang agitsü ta shiogo.

October 10 nü senden 13buba amenba sülen India Army-i, PLA-i parnoki benokba magizük aser China-ia India-i tamakoktsü takhangba agütsür, ta sangdonga liasü. Ajisüaka January senden sülenbo tangatettep ka dangi arur ama osang sangdongogo.

January 12 nü senden ghonda 13 shi menaka Kongka La anasa Hot Springs nungi PLA ainshia oatsü atema India-i takok ngua sensak mesemtet aser iba den Daulat Beg Oldi sector nung Depsang aser Demchok kübok Charding Nullah Junction (CNJ) nung patrolling rights ken o benteta meyutet.