Ladakh nung China nunger sepaitemi arrtsü adena aiter: ITBP

New Delhi, Rongchii/April 09 (Agencies): China-i Ladakh region nung aliba Line of Actual Control (LAC) nung par sepaitem tali amenoktsü nükjidong yur inyaker, ta tanü Indo-Tibetan Border Police (ITBP)-i Union Home Ministry nem report ka ajanga metetdaktsü.
Khenkhenbo China sepaitemi India litsü adener kilometer 6 tashi aiter, ta ITBP report nungjisa shia lir.
ITBP-i Home Ministry dang, Ladakh kübok Pangong Awatsünglen China nungeri Tsüklai (February) 27, Metsüremi (March) 6 aser Metsüremi (March) 9, 2018 anogotem nung India nunger arrtsü adena aitogo, ta metetdaktsü.
India aser China na tsüngda Line of Actual Control (LAC) ya ceasefire line ka lir aser iba ya Aksai Chin nungi Pangong Lake tashi nung lir.
ITBP report ajangasa, China nunger sepaitemi parnok meyong gari nung mener arrtsü adena aiter. Parnoki asemben tashi India nunger arrtsü adener kilometer 6 tashi aitogo, ta shia lir.
Himalaya tesem nung asükwa mongpu süitemba mapang ka nung China nunger sepaitemi India nunger arrtsü adena aitba kanga bulua kümogo, aser ibaji ajanga yaküm Doklam nung linük ana sepaitem tsüngda anogo aika tensa raksaba ama ano ataloktsü südi ta tebilemtsü akar.