Ladies Club Mkg-i naro ayokba sentong ka ayonga akar

Mokokchung, Rongchii (April) 13 (TYO): Ladies Club of Mokokchung-i ayongzüka anogo ananü asoshi “Flower Sales Day” ta sür naro ayokba sentong ka Mokokchung Municipal Council complex nung kadaki.
Mokokchung nung alir liso nisungtemi züsentetba naro tapu balala 50 shi bener arua MMC complex ajak tobur jungdakja tarensena yur jenjang dalang yong yokdaki.
Tanep Mokokchung Town Baptist Arogo Asso. Pastor, Rev. Chuba-i iba naro ayokba maparen tenzükja temoatsü meshia sarasademtsü.
Iba sentong ya tongtibangsa Mokokchung town nung naro lu ayimer aser naro meimertem ajungmesotsü aser club-i iba nungji apular mapa inyaktsu nükjidong yur ayongba lir, ta Ladies Club Mokokchung tir, Wt. I. Narola-i Rogonü (Friday) iba sales day tenzükba sentong tongmelang ka agidang metetdaktsü.
Iba sales day nung shirnokisa shilem agidar, parnok ajak dang pelar, ta laisa ashi. Iba ama sentong ya mapang shia ayongzüka alitsü tebilemba aliba laisa shisema liasü.
“Service before Self” omen nung ajemdaker Ladies Club Mokokchung ya 1982 küm May 14 nung tentet aser 2007 May 14 nungto par club tenzüker küm 25 ajungba jubilee mungogo. Iba club ya govt. registered club ka lir, par club tenzüker küm 36 tashi arudang, parnoki lokti ajungketba maparen balala talisa tetsür-tanurtem dak rangloker inyaka arur.
Jangratemtsükaji; 1982 küm Oct 22 nung taoba India Prime Minister, Indra Gandhi aser 1984 küm Feb 17 nung Mother Teresa nati Mokokchung semdangba mapang, district administration den civic reception maparen nung yaritepa liasü, ta angazüker.
Parnoki shisaliok, arogo, riju balala, yimti tobur jungdaktsüba, tzü mopung wazüka ayutsü asoshi süngdonglidong atemba, tetoktepba balala, mozüki aser jail semdanga teyari agütsüba, sentong tulu ayongdang parnoki kinaro (decoration) inoktsüba, Delhi nung international trade fare nunga shilem agi, car rally nung shilem agiba, beauty pageant sentong ayongzük aser lokti asoshi maparen jenti inyakba par club otsü nung lir.