Lady Gaga-i sen million $1 tenla agütsür

October 02, 2017 (Agencies): US aser Caribbean nung hurricane yipru tesashi ajanga tesama tulu adokdaktsüba sülen Lady Gaga-i sen million $1 tenla agütsü.
Texas, Florida, Puerto Rico aser Caribbean asetkong nung hurricane yipru agi tesama tulu agütsüba aser menoknok agi Mexico City nung kongshiba nem iba teyari ya agütsür, ta arishi küm 31 tain kenteneri metetdaktsü.
“Anogoshia sarasademtsüba den külemi, Hurricane Harvey, Irma, Jose, Maria aser Mexico City menoknok agi kongshir alir nem teyari sen million $1 agütsür,” ta lai Twitter nung zülutsü.
‘Million Reasons’ ken atenlai iba tenla agütsüba ajanga Justin Bieber, Beyonce, Jimmy Fallon aser Kevin Hart nunger ama nüngtugu nisungtemi sen tenla agütsüba rongnung la densemogo.
Iba alimar lendong agi kongshia aliba nüburtem nem kentener Pink-ia teyari sen dollar million tesadang agütsü aser actress Kate Hudson, shibai saisapongba mapang asemba süoshi indang Fabletics brand tenzük, laia iba brand nungi aruba taa shilem 100 agütsütsü nangzük.
Kate Hudson-i Instagram nung iba yipru tesashi agi kongshiba tesem aliba indang map ka nung, “Hurricane Harvey agi kanga sashia kongshir aliba tesemtem nung senotsü teyari ya kanga nüngdaker ta asenok ajaki meteta lir. Lokdi tentet balala nem juri teyari agütsüba den külemi ozü @fabletics kibong aser customer tema onoki akokba nung maneni yaritsü. Tanü nungi tenzüka ozü company @fabletics ajanga oset ayokba nungi aruba tajangzük (store aser online nungi) shilem 100 @AmericanRedCross nem Hurricane Harvey relief #linkinbio atema tenla agütsütsü,” ta zülur post asü.
‘Hand in Hand: A Benefit for Hurricane Relief’ tenüng agütsür TV sentong ka agiba nungi item timtem nung alirtem yaritsü asoshi sen million $15 bendentet aser US nung aliba nüngtugu nisungtem lungjemer taruba ita ‘Country Rising’ concert ka ayungzüktsü aser iba sentong nung aruba sen ajunga ya yipru tesashi agi kongshia alir nem teyari agütsütsü.