Ladybird School Mkg nung Shooting Range tenzükogo

Mokokchung, August 28 (TYO): Mokokchung nung aliba Ladybird School nung 10-meter indoor shooting range ka tenzükogo; Nagaland Rifle Association Tir, Wb. Merang Jamir-i anir par külem medemertem densema Mokokchung Press Club Tir, Wb. Limalenden Longkumer-i iba kashishiba maparen meraketa tenzüktsü.
Osang tajung kaji; Nagaland nung shooting range facility agütsüba school rongnung Ladybird School ya mezüngbuba asütsü, ta angazüker.
Limalenden-i tanü iba sentong nung jembidang, Ladybird School-i iba ama shooting facility agütsüba asoshi pelaba den iba ya amenokba ajanga tarutsü nung kashishir (shooters) tajung aika adoktsü imlar, ta ashi.
Iba sentong nung Nagaland Rifle Association Tir, Merang-ia mapang tatsüka agia jembidang, Naga nungerji akhi nungi kashishiba nung kanga junger, aji oda, tesayuba shitak dang agütsüra asenoki tangar den saku tokteptettsü, ta ashi. Tanü asüng kashishiba saisapong nung ya tejangrar meyongbo ngujem tulu lir, aser Naga nungeri iba luyim nung ya junga otettsü lenmang sadema lir, ta paisa shisem.
Iba shooting range lapokba den külemi August 28 nungi September 2, 2017 tashiji air rifle aser air pistol coaching camp den ano school tanurtem asoshi championship sentonga ka akatsü. Item sentong balalatemji kashishiba luyim nung mongintemi ketdangsüa aser anepalua agitsü.
Alempang Baptist Arogo Pastor Rev.Temsu S-i iba shooting range tasenba meshiteta sarasademtsü.