Lahing Koilajungle tenlaki meshitetogo

Dimapur, Rongchii 09 (TYO): Lahing Koilajungle nung tamangertem asoshi tekülemki tasen ka Eastern Theological College, Jorhat nungi Professor, Rev. Dr. Lima Jamir-i Amungnü meshitettsü.
Rohit Tudo aser par kibong ya küm 17 tashi par yimtsüng nungi kilometer 8 orr aliba Hingbolia Baptist Arogo nung züngsem tajung ka am alia aru. Iba sülen kasa tesem nungi kibong tasen kati Khrista agizük. Iba sülen parnoki tenlaki ka yanglutsü mulungtet. Tudo’er kibong-i par ki anasa ali ka tenla. Parnoki taoba Luchii (December) tashi nung iba tenlaki asoshi cement post ti meso. Iba sülen parnok rongsen tembangba ajanga parnoki Assam Valley Baptist Mission nungi züngsemtem dang teyari meshia asüngdang.
Assam Valley Baptist Mission (AVBM) ajanga Dimapur nung aliba Tekameri aser Lanuchuba Mission tuyu aser parnok teyari ajanga iba tenlaki renem.
Iba tenlaki meshitetba sentong nung tamangertem aser temeket nung aliba arogo nung lenirtem arua aden. Tekameri aser Lanuchuba mission tenüng nung Akang Longkumer (Tekameri mission)-i iba sentong nung ajungshi o jembi. Pa meina Lanuchuba mission nungi Temjen Longkumer aser Sutsung Longkumer arua aden. Hingbolia Baptist Arogo nungi Pastor Puspo Sawra-i iba tenlaki yangluba indang ostüren shia liasü.
Taoba Luchii (December) nung Impur Bible School (IBS) nungi Bible diploma renemsang, Gopin Ghatwal ya AVBM atema Youth Pastor inyaktsü asoshi kasa sentong nung Rev. Dr. Lima Jamir-i moaja install sütsüogo.
Impur Bible School nung Gopin azüngba ya Kumlong Baptist Church, Mokokchung ajanga yaria züngdaktsüba lir. Maneni Kumlong Baptist Church, Mokokchung ajangasa Gopin indang itasen agütsütsü nangzük.
Iba tenlaki meshitetba sentong ya AVBM nungi Evangelist Huni Gogoi-i ketdangsüa ani aser kasa EVBM nungi Evangelist Nimrudh Mandal-i tarur pela agizük. Iba sentong nung Rev. Dr. Lima Jamir-i Tsüngrem o jembi aser Eastern Theological College, Jorhat nungi Benjongnaro Imchen, Sathia, Tiakumla aser Vinotoli nungeri temeja ken aten.