Lahore nung bomp tesashi apok, nisung aika asü

Lahore, July 24 (Agencies): Pakistan anüdoklen aliba Lahore yimti nung Hombarnü bomb ka apokba lendong nung nisung 25 asü aser 52 yiru, ta ketdangsertemi ashi.
Lahore nung aliba Ferozepur Road anasa Arfa Software Technology Park lenmang nung aliba shishilembar meindoktsü asoshi police tem oa alir nem iba lendong ya agütsü südi, ta police temi ashi.
“Tang ya iba lendong indang kuli bushisüngdangba mapang ka lir, asew ibai suicide lendong ka asütsü südi. Police aser civilian 12 süogo,” ta iba tesem nung police ketdangser, Haider Ashraf-i osangbener den jembidang ashi.
Iba lendong nung police 9 süogo, ta Ashraf-isa shisem.
Iba lendong nung yirur alir rongnung nisung 10 kanga mejungi yirur lir aser parnok ya Lahore nung aliba Jinnah hospital nung lir, ta iba mozüki nung ketdangser kati osangbener dang ashi.
Temelaba melie lenmang anasa dokan lapokba aser khen atema iba tesem nung shishilembartem aliba aridoktsü asoshi oa aliba police tem dak tenük yoker amak südi, ta provincial law minister, Rana Sanaullah-i ashi.
Iba lendong indang bushisüngdang tenzükogo, ta Punjab province nung sorkar indang odongtar-i osangbener dang shiogo.
“Tang bo onoki iba lendong ajurua aliba nisungtem aser kinungertem den yaritepba mapang lir. Iba lendong ya kiralongra mapa mesüra accident ajanga adalokar bushisüngdangtsü,” ta Pakistan indang interior minister, Chaudury Nisar Ali Khan-i Islamabad nung osangbener den senden amendang ashi.
Arfa Software Technology Park ya ki 17 adongteba yangluba IT building ka lir.
Ola tulu ka angashi aser van ka nungi mokozü adoka angu, ta iba ki nung inyaker nisung kati osangbener dang ashi.
“Iba bomb ajanga gari ka poksa. Iba tesem nung tasümang aika liasü aser ni aliba ki nung aina jaksa,” ta lai osangbener den phone ajanga jembidang ashi.
Iba lendong adaloker minute trok tsüngta police aser ambulance arua yirur alirtem anepalu.
2017 April ita nunga Lahore nung sorkar nütsüngsük züngdanger nisungtem mena aliba gari nung bomb pokloktsü, aser iba amapang nisung trok asü.
February ita Lahore yimti tiyong nung longkak aiter nokdangtsü asoshi police oa aliba nung bomb poklokja nisung 13 asü.
Taoba küm Lahore nung aliba park ka nung suicide bomb poklokja nisung 70 tepset, aser iba lendong ya Pakistan nung lendong tulutiba liasü. Iba lendong ya Jamaat-ul-Ahrar teloki agütsü, ta tenüng agi aser Pakistan nung Christian pur Easter Sunday amungtsü asoshi adenshia aliba dak tenük yoker amak, ta ashi.