Lahore nung Khristan ka Islam mezüngmeshiba atema apu

Lahore, June 23 (Agencies): Pakistan kübok Lahore nung Khristan ‘bicycle mechanic’ ka Islam mezüngmeshiba onük nung ajemdaker apu.
Customer ka den mangatettep adokba sülen pai Islam mezüngmeshiba atema tai tonglokja June 15, 2017 nü apu.
Iba ken o ya Pak Center for Law and Justice ajanga bushisüngdang südar.
Lahore kübok Mariam Colony nung alir Ashfaq Masih ji ‘repair’ dokan ka nung mapa inyaker aser iba tesem nung alir Muhammad Ishfaq ta ser nisuing kati bicycle yangludaktsü, ta Human rights activist Napoleon Qayyum-i osangbener dang ashi.
Bicycle yangluba atema Masih-i sen 35-40 taa meshi saka Ishfaq-i pa sensaker ka, anungji sen tera ajemang ta shia tena o agi raratep, ta Qayyum-isa ashi.
Masih-i senji ajema mekümtettsü ta ashi aser pai Ishfaq dang pa-a sensaker ka lir aser sen nüngdaker ta langzü. Tena o agi toktepba mapang, anameta alirtem adenshi aser mejangjaba nisung kari Masih-i Islam mezüngmeshi ta tai tongloktsü aser iba jagi ken o tuluba aküm, ta Qayyum-isa metetdaktsü.
Raratepba tesemi police aruba sülen Masih apu aser pa Green Town police station-i anir ao.
June 15, 2017 nü Masih apuba sülen, pa anema Islam mezüngmeshiba ken o ka benokogo, ta Green Town police station Station House Officer (SHO), Wasim Akhtar-i ashi.