Laishiba bushiba aser angatetdaktsüba

Tanü ama anogo shia adokba osangkaket madokdang, television marudang aser mobile phone mamshidangbo azüngtsü akokertem ajaki Laishiba kanga meranga zünga liasü. Iba denji arogo shia nung tanur tain ajak asoshi Sunday school lapoka yangji Lashiba otsü den Tsüngrem o tetezü tarok rateta ashiba ajanga nisungtem Tsüngrem o nung kanga junga tera yanga intet aser yamaji Laishiba züngnüba aser Tsüngrem o tarok zülua aliba züngaka mangatetbatemji Sunday school nung angatettsü asoshi kanga jangraa liasü. Tanü sentepi arur aser arogo nung shilem agir tsüraburtemji item Sunday school nung graduate asürtem lir. Ajisüaka, tanü asenok arogo nungertem taküm yimya reprangdangra pastorbai anir asenok ajak sentep senshili English mesüra Hindi film ka tama reprangmatsü aser mobile amshia kazütsüba dak alaka Laishiba azüngtsü aser bushitsü mapang mangur. Iba denji metensür amongnü yabo anisüngzükba anogo asünungji anepdang tanurtem Sunday school agitsü aser taintem temoatsü sentep nung denerbo arogo aika nung taintem asoshi Sunday school mali kümogo aser Deobar aonung revival sentep akabatoa anenogo. Joko, arogo kar nungbo Honibar aser Bodbar aonung sentep makai akümtsü ana nung lir, kechiyong tsüngtsüng atemyonga sentepi arur mali akümer. Shitakba asenok arogo aser tamangertem taküm aser tamang jenjang asadangdi süra, iba nungji asenok akümlirtemia ogo ta aser asürtemia marua ta asüba tia nung lir. Shitakba agibo, amangba purtem sentepi marurji sentep mekali ta masü saka tsüngtsüng temaka kechiba arogo nungertem sentepi marur (?) ta shisadanga bushidangtsüla. Lashiba ya tatishitsü aketba otsütem aser Tsüngrem tanülai apuoktsüba shisatsü tarok aketba kaket ka lir, anungji otsütemji tanganütsüka shira aser Tsüngrem o tarokji rateta agütsüra, shibaibo manganütsü aser shibaibo memetetnütsü. Tenyartem mapang teyangluba nisungi Isaia tapu züngaka mangatetba  amaji, tanü Lashiba züngmaa azüngertemia mangatetba Tsüngrem o aika lir, itemji kari rateta shidaktsüner. Iba amaji Tsüngrem o tarok angatetnüa tzüraba amangba purtema aika lir. Iba ama putu ka nung asenokbo tanurtem Sunday schook kakettema züngaka mangatettsüsa yanglua lir aser taintem Sunday school-bo mali kümogo, Shitakba agibo, tanü ama alima tashitemetet toktepba aser tesayuba tasen tapu balala adokba mapang ya arogo shia nung taintem asoshi Sunday school lapoka Lai tesayuba aser teratet shitak agütsütetba Lashiba nung mongin aser tanüla agi sünga aliba nisung bushia ita sen dalang agütsür ayutsü kanga nüngdaker. Akhidang ama, asenok arogotem nung Lai bushiba ajema kümogo aser Laishiba shitak rateta ashir agia kanga anünger. Iba maparen nung asenok asentenshitsü nüngdaker. America nungbo, arogo nung tesayurtemi inyakba mapatemji yutsür, taoba US tir Jimmy Carter-i dena Sunday school tesayur mapa inyaka nübortem Tsüngrem o nung indaktsür. Asenok tamanga jenjang aientsüba ya Deobar nü temoatsü sentep nung adenba, temoatsü sentep kija nung sayuba aser angaba agibo meperitsü. Asenokji teti tanüla agi süngnüa alirtem aser Tsüngrem o anganüa tsüraseta alirtem asütsüla. Iba tejangraba adokdaktsütsübaji arogo nung tesayur tajungi Laishiba junga sayuba nungi tenzüktsü. Sentep kidang Bible study junga agütsütetra sentep telongsoba telongsoba akümtsü aser arogo shia Sunday school tesayurtemji Lai o nung takoktettem bushia toklang tenzükertem kümtsür sayudaktsüra, Tsüngrem o anganüba agi Sunday school takdang nung masem adenshitsü. Sunday school yabo tesayuri jembir atemtsüba sentong ka masü saka Lai o nungi mangatetba asüngdangba, langzüba aser shisalemsatepba sentep sentong ka asütsüla. Iba kasaji arogo nung Lai bushiba sentonga akatsüla. Iba amaji arogo nunger shiai Laishiba azüngtsü tenzüktsü aser mangatetbatem Sunday school aser Lai bushiba sentep sentong nung tesayur aser medemertem dang asüngdangtsü aser Tsüngrem tanülai tangatetba agütsübatema lemsateptsü ta asütsüsa tanur tain ajak atema Lai bushiba sentong akatsü kanga nüngdaka reprangtetter.